Seis feridos, dous de gravidade, nun accidente de tráfico en Xoane, Carballo

Dous coches chocaron como consecuencia dun accidente de tráfico na AC-418, á altura do cruzamento de Xoane, en Carballo, estrada que enlaza con Malpica. O incidente produciuse ás oito da tarde deste sábado e debido á gravidade do mesmo houbo un amplo despregamento de medios na zona, onde se deron retencións. Os bombeiros, o GES de Ponteceso, cinco ambulancias do 061, a Garda Civil de Tráfico, a Policía Local e Protección Civil actuaron no lugar.

Os vehículos implicados, un Seat León vermello e un Volkswagen New Beetle branco, quedaron totalmente sinistros. Os bombeiros tiveron que excarcerar a cinco persoas segundo indicaron desde Emerxencias. Nun dos turismos viaxaba un menor. Eran seis os ocupantes. Todos resultaron feridos, dous deles, de gravidade, segundo o 112.

Pasadas as nove da noite, os afectados foran evacuados a centros sanitarios e seguíase regulando o tráfico e traballando no punto.

O 061 confirmou a última hora do sábado que tres homes de 31, 39 e 45 anos e dúas mulleres de 28 e 34 foron trasladadas ao Chuac, mentres que o menor foi levado ao materno. Urxencias Sanitarias de Galicia enviou ao accidente unha ambulancia asistencial de soporte vital avanzado e catro básicas. Tamén foi mobilizado persoal sanitario do PAC de Carballo.

---

---

---