Carballo acolleu unha reunión do Eixo Atlántico sobre requisitos para novas liñas de financiamento europeo

Representantes de quince dos vinte concellos galegos que forman parte do Eixo Atlántico reuníronse onte en Carballo para abordar os requisitos para optar a novas liñas de financiamento europeo. O organismo está composto por 39 municipios de Galicia e o norte de Portugal.

A subdirectora xeral de Políticas Urbanas do Ministerio de Vivenda e Axenda Urbana, Sonia Hernández, e o conselleiro territorial da subdirección xeral de Desenvolvemento Urbano do Ministerio de Facenda, Luis Pedro Arechedera, ofreceron no encontro as claves para optar a fondos europeos con maiores garantías de éxito.

Facenda esixe que a cidade que opte a unha ETI (Estratexia Territorial Integrada) teña unha Axenda Urbana cun plan de acción propio, cuantificado e aliñado coa dobre transición, verde e dixital.

Na inauguración participou o concelleiro de Fondos Europeos, Iván Andrade, que tamén pechou o acto coa presentación do plan de acción da axenda urbana de Carballo, que servirá a outros como modelo de boas prácticas, e a alcaldesa en funcións, Belén Lendoiro, que lembrou que o Fórum, onde se celebrou o encontro, foi precisamente financiado grazas a diñeiro procedente da Unión Europea. Animou aos participantes no acto para apostar por proxectos que convertan aos municipios en «bos lugares para vivir». Así mesmo estiveron o vicepresidente do Eixo Atlántico, Alfredo García, e o secretario xeral, Xoán Vázquez Mao.

Desde o Eixo Atlántico avogan porque poidan participar nas ETI localidades que sexan centro de áreas funcionais e que sumen 20.000 habitantes, que é o mínimo requirido, tanto en Galicia como en Portugal.

---

---

---