A Deputación chega a Fitur para mostrar o mellor da provincia e ademais reflexionar
![Santiago Garrido Rial](https://img.lavdg.com/sc/dQswg_dBsclzzN0tI1M5HPQfjXs=/75x75/perfiles/127/1632390846844_thumb.jpg)
CARBALLO
![Uno de los actos organizados por Turismo de la Deputación en la edición del año pasado de Fitur](https://img.lavdg.com/sc/CrMDcNqMpYVLCFPpDc7BiUA7w2w=/480x/2024/01/23/00121706025601396635999/Foto/CE24C5F1_165811.jpg)
Un vídeo exhibirá as paisaxes máis espectaculares, pero tamén imaxes do que se desexa evitar, desde a polución á contaminación
24 ene 2024 . Actualizado á 09:37 h.Fitur, que empeza hoxe en Madrid, é unha enorme feira do turismo na que case todo é hiperbólico. Incluídos os vídeos promocionais, que nos últimos anos foron incluso a máis con músicas épicas e paisaxes de infarto, case sempre desde dron. Non deixará de habelos, porque ademais se comparten por miles ou decenas de miles, e o seu efecto multiplicador permite que o destino seleccionado chegue a públicos que, doutro xeito, serían alleos a esas propostas. Iso non vai faltar nestes primeiros tres días de cita internacional, e a Deputación dá a Coruña, a través da área de Turismo da Vicepresidencia que dirixe Xosé Regueira, tamén o fará, pero quere ir un pouco máis aló.
Á unha, no estade de Turismo de Galicia, preséntase Provincia da Coruña, Territorio Sostible. Servirá para explicar a estratexia de sustentabilidade baseada nos cinco plans de sustentabilidade turística en destino. Son os Fogóns do Anllóns, en Bergantiños; Fragas do Eume, Proxecto de Xeoparque Cabo Ortegal; Vía Verde Compostela-Tambre-Lengüelle, e Centro Histórico de Ferrol e patrimonio militar da Costa Ártabra. Sobra dicir que con estes alicientes, as imaxes (e sobre todo o material e os traballos elaborados en cada unha desas zonas) prometen. «Pero tamén, dende un punto de vista reflexivo, queremos poñer sobre a mesa os puntos negros, a peor cara do turismo, as masificacións, a polución...», sinalan desde o organismo provincial. E isto si que é novo. En Fitur nunca se ve nada feo, anticanónico para a dinámica de promoción. «Facémolo para invitar a reflexionar sobre a verdadeira sustentabilidade turística, que tamén é iso: evitar masificacións, ter moi en conta á poboación local... Para dirixirnos a un perfil de visitante que valora moito a calidade por riba da cantidade», explican. Turismo si, pero con respecto, sen excesos, cos máximos beneficios para os que veñen e os que xa están. As imaxes darán que falar, pero esa é xusto a idea.
Ademais de Regueira, falarán o deputado Antonio Leira e o presidente, Valentín González Formoso, e proxectarase outro vídeo, este sobre a promoción da Vía Verde Compostela-Tambre-Lengüelle, que ademais vai seguir crecendo cara ao norte. Unha ruta espectacular, aínda nos seus inicios, que aproveita a vella vía de tren entre Santiago e A Coruña e que agora é un paraíso para camiñantes e ciclistas.
Todo isto será hoxe, pero o venres haberá outra cita, tamén á unha, na que Regueira falará sobre Cabo Ortegal, Territorio Xeolóxico, nunha presentación sobre os geoparques mundiais da Unesco en Galicia, na que tamén participarán representantes da Xunta, da Rede Mundial de Xeoparques, e de diferentes entidades e concellos.
Máis aló de actos específicos, o vicepresidente intervén en numerosas reunións, foros e actividades relacionadas co turismo provincial. Hoxe mesmo farao no acto Ferrolterra Petfriendly: un destino para toda a familia, ademais da presentación do Festival de Ortigueira, organizado polo Xeodestino Ferrolterra e a mancomunidade de municipios da comarca de Ferrol; na presentación do Abanca Pantín Classic Galicia Pro 2024, ou no Galicia Fórum Gastronómico.