![](https://img.lavdg.com/sc/6SvUD0Iuyc_seLbnFCP48k9LKy4=/480x/2023/05/26/00121685110381691475604/Foto/CY28C4F2_2.jpg)
A figura aparecida na roca formouse fai máis de 300 millóns de anos
02 jun 2023 . Actualizado á 13:42 h.Os Penedos de Pasarela e Traba seguen manando sorpresas. O catedrático de xeoloxía Juan Ramón Vidal Romaní acaba de facer público que un profesor portugués localizou o primeiro geoglifo na área das figuras pétreas esparexidas polo macizo repartido entre Vimianzo e Laxe.
Localizou esta figura natural Francisco Sousa, profesional do ensino que imparte Ciencias Naturais no país luso. Explica Vidal Romaní que se trata dunha manifestación de «orixe magmática». O seu apuntamento científico é que «hai orientación dos minerais e tamén separación en zonas con cristais de feldespato de tamaño groso e outras ao lado de gran mineral fino». Isto quere dicir, agrega, que se formou cando o granito estaba a piques de consolidarse, fai máis de 300 millóns de anos. «Sería a partir dese momento —indica Romaní— cando empezarían a formarse as superficies de exfoliación que despois, ao romperse, orixinaría todas as formas do parque zoolóxico do Paleozoico».
![](https://img.lavdg.com/sc/k2xHfpHN0VRo1BJ6ao9jRMB3tv0=/480x/2023/05/27/00121685190542081929526/Foto/CY28C4F3_142752.jpg)
O geoglifo é anterior, pois, á consolidación total do granito. É moi similar a outros dous casos en Galicia, un no monte de Ou Pindo, e o outro no Gorgullo, en Antas de Ulla. «Todos teñen forma de caracol, ou laberíntico», indica o xeólogo.