Veciños de Vista Alegre denuncian a venda de droga a plena luz do día: «Regatean a berros»

Os veciños de Vista Alegre están fartos da «impunidade» coa que están a operar varios individuos en dous pisos das rúas Bispo Peláez (número 11) e Rianxo (8). Alertan de que nesas vivendas residen varias persoas, que, en principio, críanse que estaban de alugueiro, aínda que algúns veciños sosteñen que «non pagan a renda». «Hai uns residentes fixos, pero logo hai moita xente que entra e sae constantemente. De día, de noite e de madrugada», aseguran.

«Actúan sen ningún tipo de pudor. Séntense impunes e venden droga a plena luz do día, mentres nós nos sentimos impotentes e abandonados», denuncia unha muller que prefire non dar o seu nome, do mesmo xeito que outras persoas que ofrecen os seus testemuños sobre a situación do barrio. «Un deles é moi mala xente, así que mellor que non saiba nin que existo», comenta un home maior que xa ten a experiencia do problema que nos anos 80 e 90 afectou a parte deste barrio e tamén ao de Vite.

Outra residente de Vista Alegre advirte que «en Bispo Peláez non se cortan nada. Dálles igual que sexan as dez da mañá, as doce ou as tres da madrugada. Venden de día e de noite. Veñen comprar en coche, moto ou andando». Os veciños da rúa Rianxo cren que a situación que teñen que soportar é aínda peor: «Óeslles regatear a berros os prezos da droga, e tiran a mercancía pola fiestra». Un veciño di que escoitou que «un dicía que non lle vendía máis porque lle debía diñeiro, e o outro lle ameazaba». Este home asegura que neses trapicheos os regateos son frecuentes. «Ata teñen a cara de dicir que é heroína de calidade. Non se cortan nada. Non sei o que venden, pero hai uns días un estaba a ofrecer algo por 38 euros. E outro día outro dixo que por 10 euros dáballe só unha papela». Aínda que a situación se agravou desde fai uns catro meses, as vendas son anteriores.

Rebelión veciñal en Santiago contra o Banco do Pobre, o narcopiso máis antigo de Galicia

xurxo melchor

Un mozo universitario que reside nun edificio próximo ao momento de venda de Bispo Peláez asegura que dá unha volta máis longa para ir á súa casa, «porque así evito Bispo Peláez». A xente maior comentoulle que agora é peor que nos 90: «Unha das miñas veciñas díxome que entón se escondían, pero agora dálles igual. Fan a venda no portal, no parque. Tiran unhas bolsas pequenas pola fiestra, que supoño que contén a droga». Este mozo, que reside con outras universitarias, non se expón irse do barrio. «O piso está ben e non hai moita oferta en Santiago», sostén. Cre que o problema se resolvería «con presenza policial. Eu non os vexo por aquí».

Outros veciños do barrio aseguran que tanto o Concello como a Policía Nacional están ao tanto do que pasa en Vista Alegre, pero lamentan que «non se lles ve actuar. A venda vai en aumento, e non é unha sensación. Só teñen que vir e verán como venden sen esconderse. Séntense impunes». Insisten en pedir maior presenza policial no barrio para presionar e acabar así con esa impunidade. «Seguramente irán a outro sitio, pero é traballo da Policía estar amais do tema e protexernos. Dinnos que non se acabará coa droga, pero algo haberá que facer».

O trapicheo de estupefacientes disemínase por outros puntos de Santiago e do municipio

Á denuncia dos veciños de Vista Alegre hai que sumar as demandas dos residentes doutros barrios da cidade, onde están localizados outros puntos de venda de droga.

Laraño

Plantación en Pardiñas. A Asociación de Veciños A Xunlla de Laraño recolleu a denuncia dos veciños de Pardiñas pola existencia dun punto de venda de drogas, e púxoo en coñecemento da comisaria da Policía Nacional. A entrada e saída de coches é constante ao longo do día, e os veciños teñen fotos desa trasfega de persoas que acoden a comprar drogas. Incluso están case seguros de que, unha luz que nunca se apaga na casa, oculta unha plantación no interior da casa. Os veciños denuncian que, a pesar de a insistencia das queixas, non se ve pasar pola zona nin á Policía Nacional nin á Local. Denuncian sentirse indefensos.

San Ignacio de Loyola

Moi activo. Trátase duns dos puntos de venda de drogas máis antigo da cidade. A presión exercida polos veciños da avenida de Barcelona non supuxo o desmantelamento deste lugar, aínda que os afectados cren que baixou algo a intensidade das vendas, que puideron irse a outros lugares da cidade onde actúan con maior impunidade.

Rodríguez de Viguri

Nova okupación. Aos poucos días de ser desaloxado o piso desta rúa, onde uns días antes produciuse un incendio, os mesmos individuos violentaron a porta. Os veciños denuncian que novamente se venden drogas.

---

---

---