Concello de Noia e Deputación colaborarán para mellorar a seguridade viaria no municipio
NOIA
O alcalde, Francisco Pérez, trasladou a urxencia de actuar no lugar de Ponte e na estrada de Sobreviñas
15 oct 2025 . Actualizado á 16:34 h.O alcalde de Noia, Francisco Pérez, recibiu este mércores no municipio a unha delegación da Deputación que estivo encabezada pola responsable do departamento provincial de Obras e Servizos, Mónica Rodríguez Ordóñez, co obxectivo de analizar e coordinar actuacións destinadas a mellorar a seguridade viaria en distintos puntos da localidade.
Durante este encontro estudáronse diversas propostas de intervención, principalmente no lugar de Ponte e na estrada de Sobreviñas. En ambos os puntos detectáronse necesidades urxentes de mellora, afirma o Concello noiés, para garantir unha circulación máis segura e cómoda, tanto para os vehículos como para os peóns.
Francisco Pérez destacou que «a seguridade viaria é unha prioridade para este goberno municipal, especialmente en zonas nas que os veciños levan tempo demandando solucións. A nosa intención é que estas actuacións se concreten canto antes para dar resposta ás súas necesidades e mellorar a calidade de vida en todo o municipio».
Total disposición
Pola súa banda, unha vez escoitadas as explicacións do rexedor, Mónica Rodríguez resaltou a «total disposición» da Deputación para colaborar coa Administración local «en todas aquelas actuacións que contribúan a incrementar a seguridade e o benestar da cidadanía».
Así mesmo, a deputada encargada da área de Obras e Servizos expresou o seu compromiso de seguir traballando de forma conxunta co goberno encabezado por Pérez «para impulsar os proxectos que se definan nos próximos meses».