Un gol de Mario de penalti deu o triunfo aos barbanceses
05 oct 2025 . Actualizado á 22:31 h.Non era doado o desprazamento que tiña o Noia nesta quinta xornada de liga, pero os de Alberto Mariano fixeron os deberes e volveron da súa visita a Viveiro con tres puntos máis nas súas marcadora que lles serven para asentarse na zona tranquila da clasificación.
Foi un partido trabado, con moita disputa do balón, xogo directo e poucas ocasións de gol, sobre todo na primeira metade. Nese primeiro acto do choque, foron os locais os que gozaron das opcións máis claras para adiantarse, pero non as aproveitaron e o Noia foi facéndose aos poucos co esférico, aínda que sen xerar perigo.
Tórnalas cambiaron tras o paso por vestiarios. O conxunto noiés dominou con máis claridade e gozou de varias ocasións para porse por diante. Javi e Fontes tiveron nas súas botas dúas oportunidades clarísimas, e outra de Piñeiro atallouna o porteiro. Houbo que agardar a mediada a segunda parte para que se movese o marcador. Fíxoo cun gol de Mario ao transformar unha pena máxima.
A pesar de ser superior, o Noia non acadou a rematar o encontro cun segundo tanto que lles dese máis tranquilidade, como destacaba Alberto Mariano tras o choque: «O que nos faltou foi matar o partido, nos últimos 20 minutos eles estaban moi desprotexidos e faltounos definición para sentenciar. Noutras situacións isto pódenos penalizar, como nos pasou co Lugo, que nos empatou no 95 despois de ter nós varias ocasións».
Con todo, o balance que fai o técnico da xornada é moi positivo: «Sumamos de tres e portería a cero ante un rival directo. Aínda que aínda é moi pronto, é importante ir sumando puntos para afastarnos da zona de perigo».