O Barbadás adiantouse en Noia e rematou encaixando a súa primeira derrota da tempada (4-1)

A pesar de non ser protagonistas co esférico, os ourensáns tiveron as mellores ocasións nos compases iniciais. As dúas primeiras chegaron a través de centros desde perfil dereito que o dianteiro centro non acertou a mandar entre os paus. O gol chegou nun centro alto que non acertou a agarrar Brais Vázquez e acabou nos pés de David Nespereira, que anotou.

Verse por baixo no marcador activou aos locais, especialmente ao José Kanté, flamante fichaxe do Noia. O ariete catalán deu unha exhibición de pases, controis exquisitos e visión de xogo. Pasado o minuto 40, provocou un penalti tras recibir un belo taconazo de Fabio. Desde o punto fatídico non perdoou Mario Constenla. Sen tempo para asumir a igualada, na seguinte xogada, Kanté puxo de primeiras un pase longo a Fontes, que cedeu a Rachu para que marcase.

Tras o descanso, o Barbadás tratou de sacudirse o dominio local e parecía máis ambicioso sobre o céspede, pero pouco puido facer antes de acabar claudicando. Os ourensáns intentaron, sen éxito, pór en dúbidas á defensa noiesa. De feito, pouco chegaron a amedrentar a un Brais Vázquez que viviu unha plácida segunda metade baixo paus, despois do susto inicial.

Ademais, o Noia non perdoou en ataque. A primeira que tivo tras o entretiempo envíoa á cazola por medio dun disparo desde a frontal e acabou na escuadra coa firma de Fabio.

Con este terceiro tanto, o partido baixou en intensidade á vez que os minutos pendentes ían baixando.

Ao fío do 90, os locais deron o golpe de graza cun novo tanto de Constenla. A parte do triunfo, a gran noticia da xornada foi o regreso aos terreos de xogo de Jorge Queiruga tras unha lesión que o apartou durante varios meses.

---

---

---