Josefa González Hermida celebrou o seu aniversario o pasado 1 de maio
07 jun 2025 . Actualizado á 15:10 h.«Hei de cumprir os anos que me toquen», manifestou Josefa González Hermida, Pepa de Beiro, cando soprou as velas do seu centenario. O pasado 1 de maio celebrou cos seus o 105 aniversario, nunha comida familiar na que non faltaron a torta nin os agasallos. Esta veciña de Muros era a persoa de maior idade de Louro e dedicara toda a súa vida ao coidado dos seus. Sendo case unha nena faleceu a súa nai e tanto ela como os seus irmáns quedaron a cargo do seu pai, a súa avoa e unhas tías.
Cando faleceron as súas tías e só quedaba a súa avoa, Pepa de Beiro, que tiña 12 anos, tivo que deixar a escola para facerse cargo da casa. No 2020, coincidindo co seu centenario, ía celebrar na casa unha gran festa á que acudirían os seus fillos e os seus netos, residentes en América. Con todo, a pandemia impediu que o encontro puidese realizarse.
Pepa de Beiro faleceu este sábado e os seus restos mortais recibirán sepultura o domingo no cemiterio de Santiago de Louro. O funeral será ás 19.30 horas e, acto seguido, o enterro.