Deixa o coche sen freo de man e acaba medio mergullado tras atravesar un paseo e a area da praia en Boiro
BOIRO
As ondas xa pasaban por amais do vehículo cando conseguiron remolcalo
16 nov 2025 . Actualizado á 19:15 h.Moi mala sorte tivo o propietario dun vehículo, un monovolume da marca Dacia, que á primeira hora da mañá deste sábado estacionouno no aparcadoiro situado xunto ao polideportivo de Barraña, na localidade de Boiro. O coche, sen ocupantes, empezou a rodar, conseguindo superar un bordo e atravesando unha zona de árbores e un paseo para seguir por unha extensa área de area e acabar na auga.
Tras recibir o aviso da emerxencia, ao lugar desprazáronse integrantes do grupo municipal de emerxencias, que coa axuda dun tractor conseguiron remolcar o vehículo ata unha zona segura. O proceso foi complicado e as ondas xa pasaban por amais do coche cando lograron movelo.
Todo apunta a que o condutor estacionou o monovolume deixándoo sen freo de man e sen marcha, o que provocou que empezase a deslizarse. Logo, a lixeira pendente do lugar propiciou que nin sequera se frease cando chegou á zona de area da praia de Barraña.