A entidade colabora co Día dá Bicicleta de Boiro desde o seu comezo
28 oct 2025 . Actualizado á 05:00 h.O Club Ciclista Barbanza é un referente das dúas rodas. non só na comarca, senón en Galicia Son xa 41 anos os que leva a entidade na estrada dando pedais co traballo cos máis pequenos por bandeira. «A maioría das fichas son de rapaces desde 4 ata 18 anos», apunta José Ramón Torrado, directivo do club. En total son 46, ás que se suman outras 26 de ciclistas de categoría máster.
«Nós somos un club de canteira, de escola. Intentamos inculcar valores a través do deporte», comenta Torrado. Afirma que están a ver como o ciclismo está en auxe actualmente, «tanto a nivel de competición como cicloturista. E tamén se están vendo máis bicis eléctricas». Ademais, recalca que, polo que se vive no club, «o ciclismo feminino cada vez vai a máis. Cada ano entran máis nenas».
Aínda que están especializados en carreiras en ruta, tamén lle dan ao ciclocrós e, de feito, o 6 de decembro celebrarán unha nova edición, e xa serán 38, do Ciclocrós Concello de Boiro, proba incluída na Copa Galicia da modalidade. «A algún neno gústalle máis a montaña e imos ás miniBTT», afirma José Ramón Torrado, á vez que recoñece que os máster «somos máis de facer BTT».
Unha gran familia
Torrado leva 17 anos no club «e a algún o vin crecer desde que tiña 4 anos. Non hai cartos que pague iso», asegura. Porque o Club Ciclista Barbanza é unha gran familia e todos van a unha: «Eu hai días que non sairía a adestrar se non fose por eles. Teño o compromiso de ir e danme a vida». Mostra a súa satisfacción pola boa saúde da que goza a canteira da entidade e augúralle un bo futuro aos pequenos ciclistas. Desde abril ata final de setembro, todas as fins de semana percorren Galicia de carreira en carreira: «Somos dos clubs que máis nenos levamos. Imos todos en autobús, como unha familia. Somos a envexa de todos».
Como desde que empezou o Día da Bicicleta, este domingo o Club Ciclista Barbanza volverá estar presente na cita: «O número de participantes vai a máis e en Boiro vexo que cada vez hai máis bicicletas». Un coche da entidade abrirá a marcha, cos integrantes do equipo xusto detrás. Ademais, haberá pais e monitores controlando que todo vaia segundo o previsto e un furgón á cola para exercer de coche escoba.