Donativos de diñeiro e comida conviven nunhas campañas solidarias que buscan seguridade

A prevención fronte ao covid altera ata as tradicionais fórmulas de solidariedade do Nadal. Por primeira vez, o banco de alimentos realiza unha Gran Recollida na que apela á colaboración cidadá mediante achegas en metálico.

A campaña comezou e estará vixente ata o sábado en distintos supermercados da comarca, entre eles os pertencentes ao grupo Gadisa. Este ano, debido ao covid, os voluntarios non acudirán ás tendas instando a colaboración cidadá, pero os veciños poden realizar a súa achega no momento de abonar a súa compra.

A Federación de Bancos de Alimentos (Fesbal) non é a única organización sen ánimo de lucro forzada a realizar cambios nas recoleccións do Nadal. En Ribeira, o secretario de Cáritas, Manuel Mirás, comenta que estudan se é oportuno manter a operación quilo que pon en marcha en decembro nas tendas de comestibles.

Solicitude de permiso

As campañas buscan seguridade e, este ano, as doazóns de alimentos convivirán de forma especial coas de diñeiro. En Boiro, Lupe Tubío explica que, tras unha reunión, decidiron remitir un escrito aos supermercados solicitando autorización para colocar recipientes nos que os clientes depositen provisións.

Indica a boirense que «hai moitas persoas que prefiren deixar comida». Con todo, recalca a importancia das achegas monetarias. «Permítenos pagar bombonas de butano, recibos ou mercar produtos de primeira necesidade, como leite, verdura, froita ou carne».

Por iso, os representantes das tres principais entidades de Cáritas na área barbancesa fan un chamamento aos cidadáns para que colaboren coa Gran Recollida.

O noiés Juan Carlos Pérez subliñou que durante a etapa do confinamento «recibimos moitas doazóns particulares. Así mesmo, indicou que «o sistema mixto é o máis oportuno».

---

---

---