Acusan a Cacabelos de manter un discurso incoherente sobre o turismo
17 ago 2025 . Actualizado á 05:00 h.O PP do Grove mostraba onte a súa incredulidade ante as recentes declaracións do rexedor, Jose Cacabelos sobre o éxito turístico da localidade. «Hai uns días os medios reflectían os seus graves críticas: a afluencia de turistas, o impacto das autocaravanas e a saturación de servizos como a auga, o saneamento e o aparcadoiro. Eran todo problemas que esixían solucións como non dar licenzas urbanísticas, prohibir autocaravanas ou facer reformas nas depuradoras, e agora presume de que O Grove supera os 50.000 habitantes», sinalan sorprendidos. Os populares non entenden o cambio de discurso e a incoherencia do alcalde en materia turística, xa que entenden que non queda claro se este volume do que se fala, comparando ao municipio cunha mediana cidade, é un pico excepcional que ten que ver coa ponte festiva de agosto ou realmente é unha cifra media que se axustaría á realidade.
En calquera caso, aseguran desde a formación que dirixe Pablo Leiva que as contradicións non fan máis que deixar en evidencia ao goberno se o que se pretende é dar a entender que O Grove está a funcionar con solvencia en canto a temas de aparcadoiro, circulación, mobilidade ou servizos, posto que a realidade evidencia o contrario. É obvio que os populares non dan crédito ao exposto este venres por Cacabelos, o que lles leva a seguir insistindo en que na localidade é este verán «a lei da selva» en cada recuncho da península. «En San Vicente reina a sensación de ausencia de lei e orde, cunha masificación turística que o Concello é incapaz de xestionar; e A Toxa tampouco destaca por unha xestión lúcida, a pesar de que apenas aguzosa servizos efectivos e visibles, o alcalde pretende asumir máis competencias proximamente sen contar con medios nin planificación, o que suporía un lastre engadido para o resto do municipio», advirten.
Chegados a este punto, o Partido Popular asegura que estes «bandazos» sinalan unha vez máis da incapacidade do alcalde para resolver a problemática que a presión turística supón. «Segue sen reforzar depósitos de auga, infraestruturas de saneamento ou zonas reguladas para autocaravanas». E explican que ademais o municipio carece de guindastre para retirar vehículos mal aparcados e de policía que regule o tráfico.