Os alumnos do taller de hostalería da Lanzada demostraron a versatilidade do rei do marisco e a infinidade de pratos que se poden elaborar con este manxar
22 novs 2018 . Actualizado ás 10:30 h.Os alumnos do taller de hostalería da Lanzada apenas levan quince días formándose. Con todo, onte tiveron a súa primeira proba de lume. Nas súas mans estaba a degustación de centola organizada por Emgrobes para dar a coñecer as xornadas en honra a este marisco que estes días está a celebrar O Grove. A proba, superárona con nota e demostraron que existen unha infinidade de xeitos para preparar este marisco que, aínda que simplemente cocido estea exquisito, pode resultar igual de saboroso no medio duns cappelleti ou formando parte dun guacamole para acompañar aos nachos.
Ata sete elaboracións diferentes realizaron estes estudantes cun único ingrediente en común: a centola do Grove. No menú non faltaron pratos tan clásicos como as croquetas, que se volven moito máis saborosas se na súa utilización se emprega este marisco e os lagostinos. Clásico tamén é o arroz, aínda que no taller de hostalería déronlle unha volta máis e servírono no propio caparazón do animal. Pero houbo, sobre todo, lugar para a innovación. A centola demostrou que pode acompañar perfectamente a unha crema de cabaza ao hinojo ou que se pode empregar para encher uns chipirones da ría, convertendo o prato final nun dos máis exquisitos da degustación.
Aínda hai máis. Porque quedou probado que a centola, aínda que do Grove, pódese maridar con pratos máis típicos doutras latitudes. Por exemplo, a pasta italiana. Os cappelletis recheos de centola e salsa de boletus foron todo un acerto, pois sobre todo predominaba o sabor do marisco. E os nachos con guacamole de centola, servidos nuns orixinais cartóns de ovos, deixaron coa boca aberta a máis dun polo orixinal da súa presentación e polo seu sabor. Para rematar, presentáronse uns saquitos de paté suave de mexillón con centola.
Bos resultados
A actividade enmárcase dentro das xornadas da centola que a semana pasada inaugurou Emgrobes. Os empresarios mecos mostráronse moi satisfeitos co resultado que está tendo esta iniciativa. Primeiro porque este é un ano no que se está pescando moito marisco. «Na lonxa do Grove estanse subastando cada día entre dous mil e tres mil quilos de centola», argumentou o portavoz da asociación meca, Pablo Agrelo. Pero tamén porque o marisco ten bo prezo, alcanzable para protagonizar ceas e comidas. De feito, insistiu Agrelo, moitos dos 18 locais que participan nestas xornadas están a ofrecer todas as fins de semana menús pechados a base de centola. E están a triunfar. «Estamos conseguindo unha afluencia de público que en anos anteriores no tivéramos», engadiu. Na degustación estiveron tamén presentes a deputada Digna Rivas, pois a Deputación colabora co taller de emprego ao ceder as instalacións da Lanzada, e a concelleira de Turismo, Emma Torres, que felicitou a Emgrobes por liderar e conseguir recuperar as xornadas en honra a este marisco.