Investigadas en Ribadeo tres vilalbesas de entre 30 e 51 anos e unha menor por delito continuado de furto en negocios

A Garda Civil imputou en calidade de investigadas en Ribadeo a tres veciñas de Vilalba, de entre 30 e 51 anos, e tamén a unha menor, como supostas autoras dun delito continuado de furto en negocios.

Nun aparcadoiro dun establecemento ribadense sóubose que varias persoas trasladaban de xeito recorrente a un vehiculo numerosos efectos procedentes do interior dun local comercial. Facíano ocultos nun carriño ou debaixo das súas propias vestimentas, segundo a información oficial.

Os axentes procederon a identificar ás presuntas autoras e a rexistrar o maleteiro do turismo, localizando un carriño desmontado e varias bolsas de plástico que contiñan comestibles, calzado e outros artigos de venda habitual en supermercados.

Ademais, no oco preparado para a roda de reposto, baixo a moqueta do maleteiro, tamén localizaron máis bolsas con efectos de índole similar aos apuntados, pero supostamente procedentes doutros establecementos comerciais da comarca.

Comprobouse que as mulleres carecían de comprobantes de compra destes produtos, que foron intervidos. Estímase que o valor conxunto dos efectos intervidos supera os 1.000 Euros.

As dilixencias policiais foron remitidas á Autoridade Xudicial e os comestibles, entregados ao Banco de Alimentos de Ribadeo e ao dispor dos prexudicados. O calzado foi posto ao dispor dun responsable do establecemento onde foran subtraídos.

---

---

---