O BNG acusa o alcalde ribadense de non iniciar os traballos de prevención e limpeza de montes dun convenio asinado en abril e que, tras solicitarse dúas prórrogas, conclúe o 15 de outubro
27 sep 2025 . Actualizado á 05:00 h.O BNG acusa o alcalde de Ribadeo, Dani Vega, de pór en perigo as casas das parroquias ao non facer o traballo que lle corresponde en materia de prevención de incendios nos montes ribadenses. En concreto, o Bloque denuncia que en Ribadeo non se iniciaron os traballos de tratamento preventivo mecanizado ao redor das casas e núcleos rurais fronte ao risco de incendios forestais, a pesar de que o convenio -sinala o BNG- foi asinado en abril e os traballos deben estar concluídos, pagos e concluídos o 15 de outubro. E iso a pesar de que o Concello dispuxo de tempo extras, ao autorizarlle a Xunta dúas prórrogas: «E nin con esas puido cumprir coa súa obriga».
Lembra o BNG que A Mariña está en situación de alto risco de incendios, e engade: «En Ribadeo, desde o ano 2022 apenas se viu actuación algunha na faixa segunda de tratamentos preventivos arredor das casas e núcleos. Por moito que o alcalde presuma de xestión, velaquí temos outro exemplo de falta de actuación por parte do goberno municipal. A neglixencia de todo o equipo de goberno, co seu alcalde á cabeza, pon en perigo a seguridade das casas e da veciñanza. A forza váiselle toda pola boca para anunciar festa. (...) Ribadeo foi un referente modélico nas políticas de prevención do lume e na protección de vivendas e núcleos de poboación. Pero con este alcalde e con este goberno municipal do PP imos cara a atrás».