As obras da nova depuradora de augas residuais de Foz para atender a máis de 22.300 habitantes «marchan a bo ritmo»
FOZ
Ao redor de doce millóns invístense nesta infraestrutura
02 jul 2025 . Actualizado á 09:57 h.En abril do 2024 Augas de Galicia anunciaba o inicio dos traballos previos para acometer a construción da nova estación depuradora de augas residuais de Foz.
O obxectivo desta nova actuación, cun presuposto de case doce millóns de euros, é dotar ao municipio da capacidade necesaria «para acadar os obxectivos de vertido de calidade na auga tratada, principalmente no verán, cando a chegada de turistas incrementa significativamente a poboación. Este conxunto de actuacións impulsadas pola Xunta permitirán triplicar a poboación servida e multiplicar por nove a capacidade de tratamento, pois a nova depuradora de Caldouceiro contará cun caudal máximo de 700 metros cúbicos/hora e capacidade para atender a 22.342 habitantes», explican desde a Consellería de Medio Ambiente e Cambio Climático.
As mesmas fontes, con datos de Augas de Galicia, aseguran que os traballos marchan «a bo ritmo, dentro dos prazos previstos», á vez que confían en que sigan así. No entanto, destacan a complexidade e calado desta actuación, que inclúe a nova EDAR e os colectores xerais.
Lembran que interveñen «distintas Administracións e axentes relacionados tanto coa propia obra como coas infraestruturas auxiliares. Polo tanto, a boa marcha no futuro dependerá en boa medida, máis alá da vontade de Augas de Galicia, de que todos os trámites e procedementos requiridos se completen nos prazos habituais deste tipo de actuacións».
Desde a consellería insisten en que este proxecto é unha mostra máis da colaboración de Augas cos concellos, citando o caso concreto de Foz. Lembran que os traballos consisten na construción da nova depuradora de augas residuais e dun tanque de tormentas, ademais de ampliar os bombeos e colectores, «para acabar coas deficiencias de funcionamento do sistema de saneamento municipal».
Tanque de tormentas
A obra do novo tanque de tormentas situado xunto á actual depuradora, no porto, terá capacidade para mil metros cúbicos e estará dotado de tres bombas centrífugas somerxibles, medición de caudal e funcionamento autónomo con envío de datos.
Desde a consellería aseguran que se ampliará o caudal e a capacidade dos bombeos actuais e disporase de 4,7 quilómetros de novas conducións.