Cuestionan os criterios para establecer o incremento dos prezos e dubidan de que as axudas económicas comprometidas poidan evitar que haxa renuncias ás prazas por non poder pagalas
21 may 2024 . Actualizado á 16:13 h.Familiares dos usuarios da residencia de Foz emitiron este martes un comunicado no que denuncian que a subida das tarifas no xeriátrico a partir do 1 de xullo, cando entrará en vigor o contrato coa nova adxudicataria, CK Senior, alcanzará nalgúns casos ata o 96%, cun 52% de incremento de media no caso dos residentes con algún grao de dependencia. As familias consideran «abusiva» a alza dos prezos do servizo, que oscilarán entre os 1.630 e os 2.012 euros, e «desproporcionada» en atención «aos incrementos acumulados do IPC e dos salarios».
Segundo os seus cálculos, os usuarios válidos asumen un prezo actual de 830 euros, que a partir de xullo será de 1.630 euros, cunha subida do 96,5%, 800 euros máis. Os dependentes de grao I, que actualmente pagan 1.109 euros, abonarán cada mes 521 euros máis; os de grao II, 761 euros máis (de 1.222 a 1.983); e os de grao III, 653 (de 1.360 a 2.012). As tarifas, sinalan, están calculadas sumando o 4% do IVE.
«Parécenos unha suba abusiva á que dificilmente poderán facer fronte moitos dos residentes», sinalan as familias, que cren que á hora de establecer os prezos «non se tivo en conta o máis relevante e xusto. Non entendemos como se lles poden aplicar subas aos usuarios con graos de dependencia que, de promedio, pasan do 52 %, cando o IPC acumulado desde o 2018, o ano no que se abriu a residencia, ata decembro do 2023, así como a suba dos salarios no mesmo período segundo o convenio colectivo vixente, non pasan do 22 %», argumentan.
Neste sentido, piden acceso «ao estudo de viabilidade económica encargado polo goberno local que serviu de base para a fixación dos novos prezos».
«Entendemos que debido ás crises do coronavirus e á guerra de Ucraína había que actualizar os prezos, pero non con estas porcentaxes abusivas que non obedecen a criterios obxectivos de aumento dos prezos e dos salarios (...) Ademais, a suba acumulada das pensións foi do 17,7 %, 4,3 puntos inferior ao incremento medio do IPC citado», engaden. Deste xeito, dubidan de que as axudas poidan «paliar esta suba porque a inmensa maioría das pensións dos usuarios son mínimas ou de cuantías reducidas».
Así, reclaman «maior concreción sobre as axudas ás que poderán acceder os usuarios para facerlle fronte a tan brusca suba, sexan con cargo aos orzamentos municipais ou a programas doutras Administracións competentes: cal será a súa cuantía, duración e, moi importante, cales van ser os requisitos para acceder a elas, en especial se son de difícil cumprimento e na práctica provocan que a maioría dos afectados non poidan beneficiarse das subvencións. O anunciado é moi xenérico e tememos que poida tratarse dun novo anuncio de carácter político sen contido real», advirten.
Así mesmo, consideran que a alza dos prezos «incidirá negativamente na lista de espera, pois moitas familias renunciarán a ocupar un posto por non poder facerlle a este custo, e outras moitas xa nin pensarán en solicitar praza na residencia de Foz».
Os familiares dos usuarios esixen «unha información máis directa e persoal por parte do Concello», e resaltan que «a residencia de Foz debe cumprir por riba de todo unha función social e non converterse nun medio de especulación ao servicio de intereses exclusivamente empresariais».