Finanzas, sector inmobiliario e industria ofrecen os salarios medios máis altos na Mariña e a hostalería o máis baixo

Coincidentes coa retribución mensual bruta e o importe empregado no cálculo das cantidades que deben ingresar á empresa e ao traballador para ter dereito a unha prestación, as bases de cotización no Réxime Xeral da Seguridade Social varían moito, en canto ao importe, segundo o sector. Na Mariña, as medias oscilan entre os 1.117 e os 3.087 euros, documentándose ata 1.970 euros de diferenza entre ramos de actividade.

Así o confirma o Instituto Galego de Estatística (IGE), cun informe no que ofrece datos do pasado mes de xuño. No dossier permite comprobar as bases medias de cotización municipio a municipio, sendo Cervo o concello mariñán de maior media, como publicou La Voz de Galicia o pasado domingo. Pero tamén ofrece información, neste caso só comarcal, sobre os salarios brutos segundo o ramo da actividade.

Na Mariña, a base media de cotización máis alta atópase nas actividades financeiras, de seguros e inmobiliarias, rozando os 3.100 euros de media, que se elevan ata os 3.235 se falamos en exclusiva da zona oriental, onde neste ámbito destacan Barreiros e Ribadeo.

Xusto detrás aparece o ramo das industrias extractivas e manufactureiras, con 2.761 euros, aínda que a base media de cotización ascende na Mariña occidental —área que inclúe Xove e Cervo, onde se sitúa Alcoa— aos 3.220 euros. Completa o «podio» dos salarios brutos máis altos o ramo da información e as comunicacións (2.620 euros).

A hostalería, en cambio, proporciona o salario medio bruto máis baixo, con 1.117 euros, a 986 euros da media galega de todos os sectores. Séguena as actividades artísticas, recreativas e de entretemento (1.263 euros de media por cotizante) e as actividades administrativas e de servizos auxiliares (1.357 euros).

---

---

---