A comarca acabou outubro con 79 desempregados máis que setembro, pero na comparativa anual sae reforzada con 289 demandas menos
06 nov 2025 . Actualizado á 22:42 h.O final do verán, que adoita ser unha tempada na que aumentan as contratacións, aínda que con moito protagonismo da oferta de emprego temporal en comercio ou hostalería, deixou un aumento do paro na Mariña. Segundo os datos da Consellería de Emprego, Comercio e Emigración, nos 15 municipios da costa lucense había a peche do pasado mes de outubro 2.446 demandantes de emprego, 79 máis que ao finalizar setembro.
Na maioría dos concellos da costa lucense sobe o paro rexistrado. En Alfoz, ao concluír outubro había 44 desempregados no municipio, dous máis que no mes anterior; en Foz, 348, 25 máis; en Lourenzá, 57, nove máis; no Valadouro, 55, un máis; en Burela, 361, quince máis; en Viveiro, 638, 24 máis; no Vicedo, 58, dous máis; en Barreiros, 120, seis máis; na Pontenova, 63, tres máis; e en Ribadeo 388, catro máis.
Só en seis concellos reduciuse o desemprego en comparación co mes anterior. Tres deles son do occidente mariñán: Xove, onde hai 72 parados, dous menos; Cervo, con 112 demandantes de emprego, dous menos; e Ourol, con 37 solicitudes, unha menos. Ademais, en Mondoñedo (78 parados, tres menos) e Trabada (15 demandantes de emprego, catro menos) son os outros municipios onde o paro cotizou á baixa.
A estatística permite desagregar o número de parados polos principais ramos de actividade. O 78 por cento dos parados mariñáns rexistrados ao finalizar o pasado mes de outubro procedía do sector servizos (1.915 dos 2.446).
Neste sector había anotados 36 parados en Alfoz; 272 en Foz; 35 en Lourenzá; 58 en Mondoñedo; 47 no Valadouro; 291 en Burela; 90 en Cervo; 61 en Xove; 29 en Ourol; 50 no Vicedo; 499 en Viveiro; 93 en Barreiros; 43 na Pontenova; 301 en Ribadeo; e dez en Trabada.
Na construción rexistrábanse 233 demandantes de emprego; na industria, 173; e na pesca, 86, 24 deles no concello de Viveiro.
Con todo, de ampliar o foco e comparar os datos do pasado 31 de outubro cos do mesmo día do 2024 o resultado é positivo. Había entón na Mariña 2.735 parados, 289 máis.
En Foz había 378 desempregados, 30 máis; en Mondoñedo, 95, 17 máis; no Valadouro, 55, seis máis; en Burela, 378, 17 máis; en Cervo, 148, 36 máis; en Xove, 85, trece máis; en Ourol, 43, seis máis; no Vicedo, 84, 26 máis; en Viveiro, 789, 151 máis; en Ribadeo, 403, 15 máis; e en Trabada, 18, tres máis.
En cambio, a evolución foi negativa nos municipios de Alfoz —que pasou de 40 a 44 desempregados—, Barreiros —de 108 a 120 parados— e A Pontenova —de 60 a 63 demandantes de emprego—. En Lourenzá non houbo variacións.