A Xunta destinará 200.000 euros no 2026 a empezar as obras da nova fachada marítima de Viveiro

O 2026 suporá un antes e un despois para a fachada marítima de Viveiro no tramo comprendido entre a estación de autobuses e a antiga casa do guardamuelles. A conselleira do Mar, Marta Villaverde, anunciou este sábado que os presupostos da Xunta de Galicia para o próximo ano consignarán 200.000 euros ao comezo da reordenación dun espazo (o presuposto total do proxecto ascende a 1,8 millóns), no que se habilitarán unha zona peonil pegada ao mar e unha verde de transición (entre as dúas roldarán os 3 metros de anchura), e reorganizarase o aparcadoiro.

Ademais, os presupostos autonómicos destinarán no próximo exercicio 12.000 euros á planificación do reforzo do dique de Celeiro (o presuposto plurianual é de 1,2 millóns) e 250.000 euros a mellorar a conexión da rede de saneamento do porto de Celeiro á rede municipal. «É unha desas obras que parecen invisibles, pero son imprescindibles», resaltou o presidente de Portos de Galicia, José Antonio Álvarez Vidal, que acompañou a Villaverde nunha comparecencia na que a titular de Mar, no cargo desde xuño, detallou as 9 actuacións que a Xunta financiará en portos mariñáns con case 3 millóns con cargo aos presupostos autonómicos. Segundo precisou, o investimento duplica a anualidade destinada á comarca no presuposto do 2025. A maiores, dixo, os portos mariñáns beneficiaranse doutras partidas «transversais» para mellorar servizos e instalacións, entre outros.

800.000 euros para un dragado en Foz e 760.000 para acabar o abrigo no porto de Burela

Os presupostos da Consellería do Mar para o 2026 contemplarán o investimento de 800.000 euros para o dragado da canle de acceso ao porto de Foz. Ademais, o ente público destinará o próximo ano 760.000 euros a culminar as obras de reforzo do abrigo, así como a adaptación ao cambio climático no porto de Burela. O documento económico tamén dará continuidade, con 450.000 euros, ao proxecto de acceso ao porto de Ribadeo (importe plurianual de 675.000 euros).

Contradique en Morás

Finalmente, Mar contempla partidas de diferente importe para outras actuacións en fases máis iniciais. É o caso da mellora do abrigo cun contradique no porto de Morás, á que a Xunta destinará o ano que vén 80.000 euros (o custo total supera os 7,5 millóns), ou da remodelación da dársena deportiva de Foz, que se atopa nunha fase preliminar e conta cunha anualidade de 30.000 euros.

Marta Villaverde, conselleira do Mar: «A pesca mingua, pero é importante que o mar siga sendo un motor económico para as vilas costeiras»

Cun sector marítimo-pesqueiro que non atravesa o seu mellor momento, a conselleira do Mar, acompañada polo presidente e o director de Portos de Galicia, José Antonio Álvarez Vidal e Juan Sanmartín Ferreiro, así como pola alcaldesa de Viveiro, Mariña Gueimunde, varios concelleiros ou o deputado Jaime de Olano, veu destacar onte en Viveiro a importancia de que a Xunta financie a mellora de servizos e infraestruturas (renovación de luminarias, de pavimentos, de firmes, etcétera) para facilitar que as poboacións costeiras non dean as costas ao mar. «A pesca mingua, pero é importante que o mar siga sendo un motor económico para as vilas costeiras, que siga sendo unha fonte de riqueza», apuntou Villaverde, que puxo en valor a chamada «economía azul». Nese sentido, tanto ela como Juan Antonio Álvarez destacaron o movemento e os negocios que xera ao seu ao redor a náutica recreativa, con barcos, tendas de aparellos, de roupa, de servizos para os buques... «Nós poñemos o foco sobre todo no sector marítimo-pesqueiro, pero tamén hai outros usuarios dos portos de Galicia ós que tamén hai que coidar e hai que intentar facilitarlles que sexa un entorno máis agradable [...] Ó final o que importa é que o mar sexa unha fonte de riqueza e un recurso que xere actividade económica para as vilas que están ó lado do mar», indicou. Mariña Gueimunde, pola súa banda, agradeceu que Mar demostre a través dos presupostos «que hai unha aposta clara por Viveiro» e por «abrilo ó mar».

---

---

---