O hotel máis grande da Mariña roza o cheo en outubro con grupos de viaxeiros e parellas

O hotel máis grande da Mariña, o Thalasso Cantábrico As Sirenas, de Viveiro, roza o cheo en pleno mes de outubro debido á chegada continua de grupos de viaxeiros durante a semana (de domingo a venres), e de parellos mozos ou de mediana idade (os sábados e domingos). «No que vai de ano, desde o 1 de xaneiro ata hoxe [por onte], levamos vendidas 32.666 ‘room nigths’, é dicir, noites de aloxamento», expón o director dun complexo hostaleiro que, cando está ao máximo da súa capacidade, pode aloxar ao redor de 700 persoas por día distribuídas entre as instalacións do hotel de catro estrelas, que ten 146 cuartos, o de tres estrelas, que ten 26 (actualmente está pechado por obras de mantemento) e os seus 62 apartamentos.

Segundo precisa José Manuel Pereira, no mes de agosto As Sirenas sempre está farto, pero o pasado mes de xullo o incremento de ocupación foi un 30 % ao de exercicios anteriores. «E en setembro pasou igual. Tivemos unha ocupación media de entre o 70 e o 80%, con moito cliente individual, sobre todo durante a primeira quincena, e a partir da segunda quincena, moitos grupos de turismo social, pero tamén de xente de Canarias ou Baleares. E a primeira fin de semana de outubro, a do 4 e 5, estivemos ó completo. Algo que nunca pasara!», expón o executivo hostaleiro. Pereira leva máis de 11 anos a cargo dAs Sirenas e destaca o despegamento experimentado nos dous últimos anos a nivel turístico pola comarca mariñá.

«O traballo de formiguiña feito polos concellos da Mariña e a Mancomunidade nos últimos anos está dando froitos. A comarca está pegando unha barbaridade a nivel turístico», José Manuel Pereira, director Hotel Thalasso As Sirenas

Ao seu xuízo, o intenso traballo de promoción levado a cabo durante os últimos anos pola Mancomunidade dá Mariña de xeito conxunto, e polos distintos concellos da comarca de xeito individual, unido ao cambio climático, está a dar froitos, xa que cada vez máis operadores turísticos inclúen o norte galego nos circuítos que ofertan. Parte deses percorridos, segundo expón, entran por Santiago de Compostela ou por Asturias e, facendo base nAs Sirenas, en Viveiro, facilitan aos turistas excursións diarias a puntos como A Coruña, Mondoñedo, Lugo ou a praia dAs Catedrais, en Ribadeo, entre outros.

Zona de influencia

Nesta época do ano apenas hai turistas estranxeiros. «Algún francés, pero pouco máis», di. A maior parte dos grupos proceden de Madrid, Canarias ou Baleares, e as fins de semana chegan hóspedes da «zona de influencia», na que se inclúe o resto de Galicia (chegan da Coruña, Vigo, Pontevedra, Ribeira ou Boiro, sobre todo), ademais de Asturias, Cantabria e «algo de País Vasco.

---

---

---