CC.OO. a nivel estatal ve un «incumprimento claro» de Alcoa e ao complexo industrial «en perigo»
A MARIÑA
A central reclama ao Ministerio de Industria unha reunión urxente para ver que fará tras paralizar a empresa o arranque e a construción do forno de ánodos
25 jun 2025 . Actualizado á 19:49 h.A federación estatal de Industria de CC.OO., sindicato que ostenta a presidencia do comité do complexo industrial de San Cibrao, ofreceu onte unha rolda de prensa en Ferrol na que alertou da «perigosa situación» do sitio industrial e reclamou unha reunión coas Administracións ante o «incumprimento claro» por parte de Alcoa do acordo para un cesamento temporal da actividade.
Compareceron Francisco San José, secretario xeral da federación de Industria do sindicato a nivel estatal, Víctor Ledo, responsable da mesma a nivel galego, e José Antonio Zan, presidente do comité de Alcoa San Cibrao. O primeiro esixiu o «cumprimento íntegro» do acordo co persoal. Dito pacto pasaba por un parón temporal da actividade na planta de aluminio, mantendo os empregos e realizando reformas como a construción dun novo forno de cocción de ánodos. A empresa non acometerá este investimento polo menos ata o 2028, e co argumento do apagamento ibérico négase a cumprir cos prazos fixados para retomar a produción, reclamando garantías de que non haberá un evento similar.
«A situación é alarmante e perentoria e non imos ser meras testemuñas», resaltou San José, reclamando «unha reunión urxente co Ministerio de Industria» para coñecer como pensa actuar nesta tesitura.
Zan rexeitou a postura «de agardar o ano 2028 como pretende Alcoa, e como transmitiu o Estado, dicindo que non pode reclamar que se cumpran os acordos porque se non pecharía». Ademais, argumentou que o pacto «non buscaba evitar despedimentos ata ese ano, senón asegurar un futuro con investimentos e a aprobación da ampliación da balsa de lodos».
Ledo lembrou que en outubro deberían estar as 512 cubas acesas e comezar os traballos para o forno. «Alcoa é insaciable nas súas esixencias», censurou, instando as institucións a posicionarse «ou coa empresa ou cos traballadores». Afirmou ademais que ao non haber obras para completar o investimento comprometido hai habido «despedimentos» na industria auxiliar.