As dúas traballadoras de África Copias e Pedro, camareiro do Muro, «empregados do mes» do Centro Comercial Histórico de Viveiro
![Lucía Rey](https://img.lavdg.com/sc/vC-62d9U3X6yWSKC1kleGgzySq0=/75x75/perfiles/46/1622715007007_thumb.jpg)
A MARIÑA
![Lorena Pigueiras Rolle, a la izquierda, y Laura Gayoso García, a la derecha, trabajan en África Copias y han sido votadas por los clientes como «empleadas del mes» del CCH de Viveiro](https://img.lavdg.com/sc/cGXiW0hnzIgquMxIrMvDCbhBLjs=/480x/2024/02/01/00121706806202697997485/Foto/X_20240201_174348000.jpg)
Foron votados no concurso impulsado pola asociación de comerciantes
03 feb 2024 . Actualizado á 11:41 h.As dúas traballadoras de África Copias, Lorena Pigueiras Rolle e Laura Gayoso García, e Pedro Ángel Vázquez, un dos camareiros do restaurante Muro, acaban de ser elixidos como «empregados do mes» do Centro Comercial Histórico de Viveiro. O colectivo que agrupa a máis de 120 comerciantes e hostaleiros do casco viveirense impulsou nas últimas semanas unha votación para que os clientes seleccionasen o seu traballadores favoritos, como destaca a xerente do CCH, Isabel Méndez. Unha enquisa na que emitiron os seus votos máis de 1.440 clientes, e na que participaron 30 empregados do comercio e 17 da hostalería.
«Decidimos presentarnos xuntas porque somos un equipo. Non queremos rivalidades e non queriamos que a xente tivese que elixir entre unha de nós», comentou Laura Gayoso, que leva ao redor de tres anos e medio traballando en África Copias. Un negocio no que está encantada, entre outros, «polo contacto coa xente». Unha satisfacción parecida sente Lorena Pigueiras, que se incorporou hai dous anos e medio a un pequeno negocio especializado en impresión, dixitalización, cartelería, venda de material escolar e de oficina, ou librería, entre outros. «É un traballo moi entretido porque falas con moita xente, e cada día é diferente. O tempo vola aquí!», relata a profesional, que, do mesmo xeito que a súa compañeira, sente moi orgullosa de que os clientes a elixisen como empregada do mes. Unha distinción que tamén valoran, Lorena Cal Chao e Ruth Adrio Monterroso, propietarias de África Copias. «Traballan como se fora para elas. Teñen paciencia, son amables, serviciais, moi responsables... Temos plena confianza nelas e que decidisen presentarse en equipo aínda nos enorgullece máis», detalla Lorena.
![Pedro Ángel Vázquez, camarero del restaurante Muro, resultó elegido como «empleado del mes» del CCH de Viveiro en el sector hostelero](https://img.lavdg.com/sc/FsldJxtSJt5bN9k_vDkG0PGu8Wc=/480x/2024/02/01/00121706806202154358118/Foto/X_20240201_174310000.jpg)
No sector da hostalería, o elixido foi Pedro Ángel Vázquez, camareiro desde fai uns tres anos do restaurante Muro, que dirixe Víctor Valenzuela. «Estou moi orgulloso. Trátase dunha iniciativa que propuxen hai tempo ó CCH, e que por amais o primeiro elixido sexa empregado meu é unha satisfacción», comenta Valenzuela, que define a Pedro como «unha persoa moi sacrificada no traballo e aberta coa xente». «Estou moi contento», conclúe.
Campaña polo día de San Valentín
Co lema «Déixate namorar polo comercio local», o CCH de Viveiro organiza unha campaña polo día de San Valentín na que sorteará: dúas ceas, unha masaxe en parella, dez mojitos «dá paixón», cinco botellas de espumoso Brinde de rosas ou tres caixas de doces. Hai que subir os billetes de compra á aplicación do CCH do 2 ao 14 de febreiro.