Tres dos xerentes das discotecas «top» de Galicia: «Fin de Ano é unha noite máis tranquila que calquera sábado»

Traxe negro ou azul? Gravata ou paxarela? Póñome tacóns ou non? Farame falta abrigo? Preguntas que se repiten ano tras ano entre os mozos (e os que non o son tanto), que empezan a pensar con semanas de antelación os seus plans para a Noitevella, o que non é de estrañar, se temos en conta que os establecementos do lecer nocturno empezan cada vez antes coa venda de entradas. «Nós vendemos os billetes por tramos de prezo. Os clientes poden empezar a facerse con eles un par de meses antes do evento», relata Nino Blanco, xefe da discoteca Blaster, en Santiago de Compostela.

A maioría das grandes salas de Galicia adoptan a mesma estratexia de venda que Blaster, unha delas é a discoteca coruñesa Pelícano, a máis grande de Galicia. Luis Diz, un dos seus propietarios, explica que en Fin de Ano, curiosamente, véndense menos tickets, pero a un prezo maior, para que o local non se sobremasifique e que os asistentes poidan gozar sen abafos: «Esta é unha noite nas que non somos partidarios de cargar. A capacidade adoita ser dunhas 2.000, 2.200 persoas, mentres que nunha sesión normal pode ser de ata 3.000. Se ti estás a pagar 45-50 euros por entrar, terás unha maior expectativa que cando pagas 12, así que debemos coidar moito os detalles e que o servizo ofrecido sexa áxil». Os tres locais están preto de poder colgar o cartel de sold out, algo que, segundo Luis, anuncian case sempre a finais de decembro, pero que se consegue con máis ou menos antelación en base a factores externos fóra do seu control. «Ás veces remátanse nunha semana e outras ata os días previos, nada. O clima inflúe moito na última arrancada de venda de entradas, hai persoas que non lla queren xogar e se veñen a Pelícano, garántense estar nun sitio amplo e cómodo, sen importar se fai moito frío ou chove».

NON SE PODE FALLAR

«Unha das claves para que todo saia ben, é facer unha preparación previa adecuada. Ter as cousas claras e un equipo ben dirixido, que todo o mundo saber que facer en todo momento», opina José Luis Asenjo, xefe da discoteca Tokyo, en Vigo. José e o seu equipo —conformado por unhas 15 persoas normalmente, pero nesta celebración aumenta a unhas 17-18— deben apertarse as caravillas para que todo saia ao pedir de boca: «Ten traballo, a verdade. Hai que montar un roupeiro máis grande, xa que a festa, ademais de en Tokyo, ten lugar en The Great G. Logo hai que cortar toda a froita necesaria para os combinados, que é moitísima, ter o botellero e as neveiras cheas... É algo que normalmente facemos na propia noite, pero ese día hai que deixalo feito antes». Outro detalle no que ningún dos propietarios quere sorpresas é na música, xa que os tres contarán cos seus DJ´s residentes, e os xéneros musicais alternarán entre o reguetón, a electrónica e o urbano.

A forma de afrontar a velada, aínda que similar á hora de ofrecer unha experiencia acorde ao prezo, varía segundo o establecemento. Por exemplo, en Pelícano, consideran o Fin de Ano como «unha noite máis». «Non é unha data coa que che volvas tolo, como si era hai dúas décadas. Para nós, Halloween é máis importante», indica Luis Diz. Por iso, a sala coruñesa non aumenta o número de traballadores, pero tampouco o reduce, a pesar da menor capacidade: «En total, normalmente somos uns 50 ou 60, e ese día será igual, porque, aínda que haxa menos xente, queremos que estea ben atendida en todo momento». En Blaster tampouco se conta con máis persoal en Noitevella, pero, ao contrario que en Pelícano, (aínda que si que se prepararon visuais con temática relacionada co evento, que se proxectarán na xigantesca pantalla do local) óptase por tratar o evento de forma distinta a un sábado calquera. «Desde que Abel Caballero acende as luces, nós pomos a decoración do Nadal, ja, ja, ja, ja. O 1 de xaneiro, ademais de darlle cotillón a todo o mundo, ás catro da mañá celebramos unhas segundas badaladas. Preto desa hora, uns 10 minutos antes, repartimos unha bolsita con 12 gominolas a todos, que serven a modo de uvas. É un dos puntos álxidos da festa», conta Nino Blanco, propietario da sala santiaguesa.

TODOS DE ETIQUETA, Ou NON?

Cantos de vós aproveitastes o Black Friday para comprarvos a vestimenta perfecta e así saír inmaculados en Fin de Ano? Pero realmente fai falta? Os xefes destas salas responden de forma rotunda. «Dámoslle liberdade á xente. Nós só temos un código de acceso coas normas típicas que ten calquera local de lecer nocturno. Non queres que ninguén entre cunha vestimenta abandonada, pero non se esixe que veñan de traxe nin nada de iso», aclara Luis Diz. Os responsables de Tokyo e Blaster din o mesmo, e este último, engade que deixar a alguén fóra por non levar traxe é ilegal.

Aínda así, en Fin de Ano é estraño ver a alguén que desentoe por ir pouco arranxado entre a multitude. Unha multitude entre a que nos podemos atopar a persoas de moitas idades, sobre todo o grupo de 21 a 35 anos. «É unha data na que hai un ambiente bastante variado. Nós temos a particularidade de facer a festa en dous locais distintos, que de normal adoitan estar dirixidos a un público obxectivo distinto, pero que nesta noite mestúranse», detalla José Luis, xefe de Tokyo. Isto indica, que Noitevella é unha cita marcada nos calendarios de millóns de persoas, sen importar a idade, como un momento para saír a celebrar, tanto que semella coma se unha especie de mente colmea provocase que a maioría de asistentes acudan a estes eventos á mesma hora. «Abrimos as portas á unha da madrugada, pero o groso da xente chega entre as 2.30 e as 3.00, ata esa hora apenas hai movemento», apunta Nino. A festa dentro dos locais alóngase ata altas horas da madrugada, Pelícano, por exemplo, pecha ás oito da mañá, e, para os que se atrevan, cinco horas despois, organiza unha sesión chamada Wake up, para os amantes da música tecnos.

NOITE DE AMOR E DE PAZ

«Levamos 31 anos abertos. Pódoche dicir que en Fin de Ano, nunca tivemos ningún problema», revela Nino Blanco. O propietario de Blaster relaciona esta tranquilidade coa época do ano na que estamos: «Temos as mesmas medidas de seguridade que temos, por exemplo, un venres, ou un sábado, é exactamente igual. Normalmente, nas festas do Nadal, estamos todos en modo happy, sabes? Habitualmente tampouco adoitamos ter problemas, pero nestas datas aínda menos». Luis Diz vai un paso máis aló e asegura que esta é a noite máis tranquila do ano: «Non pode haber ningún problema. Non adoita. Calquera día normal pode ter máis complicacións. Esta fin de semana, por exemplo, coas ceas de empresa, os que non están habituados a saír vanse de festa e ponse a mesturar viño con outras bebidas espirituosas de alta gradación, o que nos deixa con dúas posibilidades: ou a borracheira tómbaos ou ponos violentos, e estes últimos son os que che poden pór nalgún aperto. Con todo, ninguén quere que lle estraguen a Noitevella, así que todo o mundo adóitase comportar». José Luis, xerente de Tokyo, comparte o sentimento de Luis Diz e Nino: «Os clientes adoitan vir de bo rolo».

Con todo, isto non significa que non se tome alcol esa noite, todo o contrario, polo menos na discoteca Tokyo. «A xente paga unha entrada máis cara que do normal e ten tres consumicións, así que, en xeral, é un día no que bebe máis. O ron e o whisky son os máis pedidos», explica José Luis, o xerente do local. No entanto, tamén existe unha porcentaxe de asistentes que optan pola abstinencia, algo que sinala Luis Diz: «Ningúns se toman un refresco ou un agua.no temos que pór o sambenito de que son alcohólicos aos que saen de esmorga». Decidas beber ou non, o importante é ser respectuoso cos demais e empezar o 2026 da mellor forma posible cos teus seres queridos. E, para logralo, Nino Blanco dá unhas sinxelas claves: «O mellor é que cada un saia de festa e goce a velada. Non se necesita nada máis».

---

---