Cinco terrazas galegas que parecen Eivissa: «A xente entra co móbil por diante para facerse a foto»

Xa sabiamos nesta esquina noroeste hoxe tan cobizada que non era necesario moverse para gozar de praias paradisíacas. Pero este agosto abrasador confirmou que non fai falta coller un avión, nin sequera o coche, en busca do sol. Se o tempo era quizais a única materia pendente para asegurarse un verán de impresión en Galicia, o deste ano viño a confirmar que o amante da praia, aquí, teno todo. E que mellor xeito de gozalo que refrescándose ao sol e coas mellores vistas ao mar.

Percorremos cinco terrazas que ben poderían estar en Eivissa sen saír da costa galega. E a primeira atopámola na súa potencia turística por excelencia, Sanxenxo, concretamente na parroquia de Noalla. Na Terraza Corsario, un lugar con maxia e bo ambiente, como se presentan nas redes, a xente entra co móbil por diante. «Veñen coa cámara preparada na man para facerse a foto, todo o mundo quere ver a posta de sol desde aquí», cóntannos neste local que dispón dun banco que se balancea a modo de randeeira, «e que ata o propio Concello sinala como punto de interese». Ninguén sae de alí sen columpiarse co mar de fondo.

Tamén dispoñen dunha zona chill out na que destaca unha furgoneta restaurada do 67, unha Citroën HY co seu característico morro de porco que hoxe serve de barra para a coctelería. A música en directo é outro dos selos deste establecemento que ofrece concertos de martes a venres, normalmente entre as 19.30 e as 20 horas, coincidindo coa posta de sol, e sesión de DJ as fins de semana. Moi próxima á praia de Foxos, esta terraza é un auténtico balcón ás Rías Baixas.

Con respecto á súa oferta culinaria, porque aquí tamén é posible comer, destaca a súa cociña tradicional. «Estamos especializados na grella, con peixes e carnes á brasa. Non traballamos nada de piscifactoría, e a carne é de primeira calidade», destacan. O tapeo e o churrasco tamén son característicos no local, que dá a posibilidade de reservar mesa na súa páxina web, algo especialmente recomendable este mes. Ademais, ten aparcadoiro gratuíto ao dispor do cliente para facilitar o desembarco nesta terraza claramente pensada para beber, tamén, coa vista.

REFERENTE NO GROVE

Moi preto de alí, no Grove, detémonos noutra terraza de postal con vistas á súa praia máis popular, a da Lanzada. Alí podes cansarte de andar pola beira ao longo dos seus 2,5 quilómetros de lonxitude e despois parar para repor forzas nun deses establecementos que son xa unha referencia do verán, Arrozaría A Lanzada & Sunset.

Recoñecible pola súa terraza Sunset, onde podes tomar un cóctel e gozar da música en vivo sobre a praia, esta arrozaría asador dispón ademais de zona infantil, aparcadoiro privado e unha gastronomía local con ingredientes de primeira calidade —mariscos e peixes da ría, tenreira galega e polbo, entre outros— nunha contorna para desconectar e seguir gozando do mar. A barca da súa terraza é unha das atraccións do local, e nela os clientes non só se toman fotos, senón que incluso sentan para gozar da súa consumición. «Este ano engadimos unha xeadería con xeados artesanais, feitos por un obradoiro, e tamén unha colaboración con ChichaLovers, de Santiago», indica o xerente. Unha proposta máis desenfadada que leva o sabor da aldea ao pan, con varias opcións de hamburguesa que levan os populares roxóns entre os seus ingredientes.

Tamén lle deron outra volta á decoración da terraza, á que lle imprimiron un xiro se cabe máis tropical: «Engadimos á zona chill out moitas máis plantas e palmeiras». A maiores, crearon unha zona máis disco con estrutura de luces e unha gran bóla de discoteca, para rematar o día cunha festa e as mellores vistas ao areal.

AIRES IBICENCOS EN OLEIROS

Escondido no Parque das Trece Rosas, en Oleiros, atópase o Vaiche Boa, un espazo fresco e acolledor que desprende claramente un aire mediterráneo, especialmente ibicenco, pero sempre arraigado no mellor de Galicia. Desde a cristaleira do restaurante albíscase a terraza ao aire libre con vistas directas ao mar, —está situado amais da praia de Bastiagueiro—, mobiliario moderno —hai tumbonas para gozar da paisaxe— e zonas chill-out, que crean unha atmosfera relaxada e informal que lembra aos beach club de Eivissa. Non falta nin a música. Os mércores de verán a partir das 19.30 horas hai tardeo con músicos locais ou artistas que se atopan de xira por Galicia, e os domingos ao mediodía na sesión vermú tamén hai concertos en directo. A carta da terraza ofrece un picoteo sinxelo para tomar algo mentres se goza da paisaxe. Entre as propostas destacan os mexillóns en escabeche tailandés, as berenxenas con mel e miso, pito chips (rabas de pito rebozadas en patacas chips) e as croquetas de xamón. «Pratos que a nivel de execución para nós son sinxelos, pero que sorprenden algo aos clientes», indica Jacobo Astray, propietario do Vaiche Boa. Para beber, polo volume de traballo, ofrecen unha carta de cócteles reducida, e sinala que os mojitos, a sangría e o Aperol é o que máis traballan. «Entendemos que menos é máis. E pola cantidade de xente que hai, temos unha carta reducida, pero están moi ben e saen moito», indica o empresario, que apunta que levan varias semanas, en parte grazas ao bo tempo que está a facer, con moitísima afluencia de xente, sobre todo as fins de semana ao mediodía e a diario polas tardes.

«A nós vénnos moi ben estar situados aquí, é un paseo moi bonito, moi agradable, e cáennos clientes por aí, xente que vai dando un paseo e que de súpeto se atopa o local, outros que saen da praia e queren tomarse un mojito, un gin-tonic ou un refresco, e logo tamén temos clientes que veñen expresamente a estar tirados vendo o mar», comenta Jacobo, á vez que subliña que estas semanas están a notar «moito turista nacional, sobre todo, e algúns estranxeiros, que se aloxan en hoteis próximos e que buscan este local que xa se converteu nun referente na zona.

Para el, as 20.30 horas é o momento ideal para sentarse a gozar da contorna. «Nós non temos o posta sol directa, pero a luz que queda co atardecer, co ceo avermellado, é incrible», explica Jacobo. Hai agora un ano abriu a terraza do Vaiche Boa, que abre de martes a domingo de 12 do mediodía ata medianoite; e tres meses despois, en outubro, inaugurou o restaurante, cunha proposta gastronómica máis elaborada, que funciona de mércores a domingo ao mediodía, e os venres e sábados tamén de noite.

TUMBONAS EN CABANAS

Só quen coñece a súa historia poden asociar á Arxentina Sunset Club de Cabanas, en plena praia da Magdalena, coa pequena churraría que foi nos anos 70 e que hoxe ten a filosofía de levar un bo produto a pé de praia a veciños e veraneantes. Coa segunda xeración familiar, o local transformouse dando un xiro que o transformou en café-bar con carta para comer na praia. Agora en mans da terceira xeración desde o 2017, renovouse como un chiringuito de praia que incorporou as novas tecnoloxías para dar lugar a un gran restaurante na area, moderno e minimalista, cunha coidada decoración e un equipo mozo que se afana en atender cada unha das zonas do establecemento. A pérgola Santa Mónica, en primeira liña de praia, está amparada por toldos despregables e ten o seu propio chan de madeira. Pola súa banda, a terraza principal está á beira do mar e nela o cliente pode degustar as diferentes propostas gastronómicas —con mariscos, ensaladas, carnes e peixes—. Ademais, teñen unha terraza con ambientación natural e vistas ao piñeiral, un oasis de intimidade con lámpadas cálidas, cortinas de esparto e unha decoración que crea a atmosfera idónea para ocasións especiais.

Para completar a experiencia, dispoñen dunha zona de tumbonas sobre a area con vistas ao mar, conectadas co restaurante por unha pasarela de madeira e resgardadas por antucas de breixo. Tombado nelas, o cliente pode pedir as consumicións con só pulsar un botón. É posible alugalas por 14 euros en horario de 12 a 21 horas, 10 euros de 12 a 16 horas e 10 euros de 16.30 a 21 horas.

SOLETE EN AGUETE

Hai dúas cousas que non cambiaron nada nOs 3 Monos Aguete, en Marín, desde que empezou a súa andaina, unha é o éxito que ten e outra son as súas espectaculares vistas á praia. Tomar algo na súa terraza é como estar na area, pero cunha panorámica impresionante. O que si cambiou, e a mellor, foi o recente recoñecemento co Solete Repsol á súa cociña fusión. «Fixemos un cambio de carta que inclúe agora máis marisco, tamén por encargo, e arroz con bogavante, ameixas... produto do mar, en definitiva», detalla Rubén Paz, que destaca a espetada de rape con gambón como algunha das novidades que mellor funcionan nunha proposta gastronómica que tamén sumou máis sobremesas. Iso si, coller sitio en pleno verán non é tarefa doado. «Estamos a rebentar. A diferenza do noso local de Samil, onde a demanda é máis estable ao longo do ano, aquí hai moito contraste», indica Paz, que entre as opcións para tomar algo resalta a coctelería, toda de autor, e apunta que realizaron melloras nas instalacións e na iluminación. Pero se o que queremos é asegurarnos un sitio nunha das terrazas máis cobizadas do verán galego, dan a opción de facer unha reserva previa para ter mesa nun establecemento que tamén é restaurante e local de copas. Este foi o primeiro dos tres establecementos dOs 3 Monos en Pontevedra, aberto en plena pandemia. Dous anos despois instaláronse en Samil (Vigo), e hai un ano inauguraron Vacaloura na praia de Portocelo, tamén en Marín, xa que tanto Rubén Paz como o seu socio Fernando Fernández querían ter un local con cociña tradicional galega. Aos tres únenlles, como ao resto de negocios destas páxinas, unhas vistas ao Atlántico que nada teñen que envexar ás do Mediterráneo ibicenco.

---

---