Foi o propio Rubén o encargado de comunicar a feliz noticia a través das redes sociais
03 may 2021 . Actualizado ás 11:34 h.Seis días despois da data prevista, este sábado Luar chegou o mundo. Foi o seu papá, Rubén Castro, o encargado de comunicar a feliz noticia a través das redes sociais. «Perdoade o silencio, a ausencia e o non contestar as vosas mensaxes, estaba a lle dar a benvida ao mundo a esta preciosidade que teño por hije», sinalaba Rubén, que tamén quixo agradecer todas as mensaxes e felicitacións recibidas durante estas primeiras horas. «Foi o máis difícil e desexado que vivín ata agora. A aventura só acaba de empezar», escribía na mesma publicación na que se pode ver parte da carita e unha man da criatura agarrando un dedo.
De momento, descoñécese como foi o parto, aínda que el mesmo sinalou fai uns días a este xornal que llo imaxinaba na auga e sen epidural. «Vin moitísimos vídeos, e teño como un parto idílico. Escollín este sitio porque teñen un programa de parto respectado en auga, e gustaríame que fose así. Á parte de todo o que é un nacemento consciente e ben coidado, que puidese acabar en auga, o menos medicalizado posible», explicou.
Seguro que máis adiante, o propio Rubén non terá problema en contar a experiencia, porque desde hai meses el e dúas persoas da súa máis absoluta confianza están a inmortalizar todo o proceso para producir un documental, Papá gestante, co que pretender dar visibilidade á comunidade trans desta realidade. «Tamén nos gustaría que servise na educación, ou en ámbitos máis grandes como o laboral ou sanitario para que persoas que se dedican a traballar con persoas, se atopan a unha persoa trans, teñan unha base e saiban o que é importante nestes casos. Trátase de achandar o camiño ao resto, e dalo a coñecer á sociedade, porque é unha realidade moi descoñecida».
Foi un camiño longo, Rubén explicou que se atopou con moitas portas pechadas e moitos feos por parte de profesionais sanitarios, con todo, a ilusión por traer ao mundo ao seu propio fillo ha podido con todo. «Cando ti queres algo, non hai nada que poida con iso», confesaba.
