A Axencia Europea de Pesca cumpriu esta semana os seus primeiros dez anos en Vigo. Falamos dunha institución que reúne a funcionarios comunitarios de 15 nacionalidades distintas. E que se encarga de controlar a política pesqueira en todo o continente. Cando chegou á cidade, en 2008, tiña 40 traballadores. Hoxe son xa 63 na súa sede de García Barbón.
Ter a European Fisheries Control Agency é como ser sede dun ministerio europeo. En España, só hai outros dous organismos comunitarios. En Alacante, está a Oficina da Propiedade Intelectual da UE. E, en Bilbao, está a Axencia Europea para a Seguridade e a Saúde no Traballo.
Orixinariamente, a axencia comezou a traballar en Bruxelas hai máis de dez anos. E o seu traslado a Vigo decidiuse «en recoñecemento ao liderado do porto vigués como primeiro porto europeo, tanto en cantidade de pesca desembarcada, como en industria».
O curioso do caso é que a Unión Europea pode ter o seu ministerio de pesca en Vigo. Pero o Goberno de España segue mantendo a súa Secretaría Xeral de Pesca en Madrid, para estar preto das troitas que puidesen ser capturadas con culleriña no Manzanares.
Outro tanto sucede coa Consellería de Pesca, que segue emprazada en Compostela, para vixiar ás carpas que ocasionalmente puidesen remontar o río Sar.
É difícil imaxinar por que Vigo pode ser sede dunha institución europea e non pode selo dunha de ámbito estatal ou autonómico. Haberá que insistir en que en Alemaña hai ministerios que están repartidos por diferentes cidades do país. Aquí non temos esa sorte…