O reto de decorar Vigo foi maiúsculo: «O alcalde pediu o mellor, agardamos ter estado á altura»
24 dic 2017 . Actualizado ás 05:00 h.Abetos nevados, un enorme poboado, un candil no que apetece meterse a contemplar á xente pasar e unha casa de Papá Noel que invita a sentarse a tomar un chocolate mentres se charla co home vestido de vermello. Estes son só algúns dos múltiples detalles do Nadal que converteron a cálea Príncipe de Vigo en todo un referente este Nadal. Porque tamén poderiamos falar dos dous bonecos xigantes de madeira, do carrusel ou dos trineos nos que poucos se resisten a sacarse unha fotografía. Que o espírito do Nadal teña invadido desta forma a cidade ten uns culpables: Miguel Suárez Cedeira e Ana e Mara Núñez. O primeiro é o responsable de Eventum Pro , empresa especializada na ambientación de centros comerciais e cidades. Elas, en cambio, son Imaxina o Imaxinable, unha firma cambadesa que se dedica á organización de eventos e que se ocupou de pór todos os detalles desta decoración de Nadal perfecto.
«O traballo que hai detrás foi bestial, porque traballar na rúa é moi complicado», explica Mara Núñez. «A experiencia foi moi boa porque aprendemos moito», engade Ana. O proxecto orixinal foi deseñado por Eventum Pro , «nós ocupámonos de decoralo, de ver onde se situaba cada cousa», relatan. Non era a súa primeira vez. O ano pasado, estas irmás encargáronse tamén de vestir a casa de Papá Noel que recibe aos pequenos da casa en María Pita. Pero o proxecto de Vigo é doutras dimensións, «son once escenas diferentes», argumentan. Foron necesarios nove días de montaxe, camións e camións de terra e ata unha espectacular nevada artificial para que todo luza perfecto. «O bonito foi velo desde cero e agora rematado», engade Mara.
Entre bambalinas
Detrás deste deseño está Eventum Pro , unha firma que se especializou na ambientación do Nadal. Ten unha máxima: «Non hai límites, nin ao traballo, nin á creatividade», asegura Miguel Suárez. E reitera que tras algo tan sinxelo como unha decoración do Nadal «ten un montou de traballo detrás e un montou de persoas». Só en Vigo foron precisos medio centenar de operarios. Non dubida en recoñecer que parte do éxito do proxecto débese á implicación do cliente. «Primeiro escoitamos que quere facer o cliente e o alcalde quería que a súa cidade fose a máis bonita do mundo. Creo que o logrou», argumenta. Sostén que en Eventum «somos capaces de facer calquera cousa que nos encarguen, pero se non hai vontade e non se poñen medios é imposible. O Concello de Vigo empeñouse en ser un referente nacional en ambientación de Nadal e logrouno».
A proba do seu éxito é que todo o mundo «interactúa coas escenas. A xente está emocionada, necesita tocar, abrazar...», din os decoradores. O investimento e o esforzo foron grandes, sostén, «pero está a ter un gran retorno en afluencia de xente e en promocionar o nome de Vigo».