Adif renovará a liña férrea de Guillarei a Redondela por máis de 62 millóns de euros

O Consello de Ministros autorizou onte ao Ministerio de Transportes e Movilidad Sostenible a licitar, a través de Adif, un contrato por 62 millóns de euros (IVE incluído) destinado á renovación da liña de ferrocarril convencional Guillarei-Redondela, de 23,5 quilómetros. O Goberno di que a actuación supón un novo impulso ao Corredor Atlántico en Galicia e a conexión con Portugal. Pero do saída sur de Vigo mediante un túnel non se fala na resolución.

Os traballos están destinados a modernizar o trazado, coa instalación de novas travesas, balasto e desvíos de maiores prestacións.

Ademais, ampliaranse as dimensións (gálibo) dos seus catro túneles (Vos Valos, Padrón, Pregal e Pedriña, que teñen unha lonxitude entre 53 e 972 metros), aos que se dotará de novos sistemas de protección civil e seguridade, e construiranse muros de ancoraxe de postes de catenaria na liña, para a súa posterior electrificación a 25 kV, fronte á de 3 kV actual.

A actuación complétase coa construción dun novo viaduto de 82 metros e tres vans, que substituirá ao actual sobre a estrada N-550, a renovación dunha vintena de pasos inferiores, o reforzo de terrapléns e desmontes da liña e a remodelación de plataformas da estación de Louredo-Valos.

A actuación representa un novo avance no plan de modernización que o Ministerio está a acometer en toda a liña Ourense-Vigo Guixar, denominada Liña do Miño, que inclúe a conexión Guillarei-fronteira portuguesa, cun investimento de 265 millóns de euros (IVE incluído).

Desta forma, adecuarase o Corredor Atlántico, reforzarase a conexión con Portugal e aumentará a capacidade para tráficos tanto de viaxeiros, como de mercancías. Esta actuación poderá ser cofinanciada polo mecanismo Conectar Europa da Unión Europea (CEF).

No marco deste plan, xa se completou a mellora de plataforma deste trazado; no tramo Vigo-Guillarei-Tui, finalizaron actuacións como a electrificación do trazado Guillarei-Tui e a ampliación a 750 metros de plataformas da estación das Gándaras e xa se licitou o reforzo da accesibilidade da estación de Redondela.

Electrocutado

O pasado 23 de maio de madrugada, preto da estación de Redondela, un traballador dunha empresa contratada de Adif atopábase realizando labores de mantemento a un quilómetro da estación cando se electrocutó. Este tivo que ser evacuado ao Hospital Álvaro Cunqueiro en estado moi grave, e a día de hoxe continúa hospitalizado.

Algúns datos, como o nome da propia empresa, aínda non se esclareceron. As empresas están a ter opacidade respecto diso. O que se sabes que houbo unha descarga eléctrica e que a persoa implicada precipitouse desde a altura á que traballaba, uns 8 metros, ata a vía. O traballador tiña 24 anos, segundo informaron fontes do Partido Comunista dos Traballadores..

---

---

---