O equipo Pegaso da Garda Civil sobrevoará con drons toda a costa para vixiar o cumprimento da normativa
15 jun 2024 . Actualizado á 05:00 h.Guerra sen cuartel contra as trincheiras en Praia América. Nigrán aplicará man dura para protexer o areal durante a celebración de San Xoán e sancionarase con multas que poden chegar ata os 200.000 euros a quen non respecten a prohibición expresa de facer buracos no areal. «O máis importante é informar á mocidade de que este ano será diferente en Nigrán, poderase festexar o San Xoán pero sen cavar buratos que atentan contra o noso patrimonio natural. Estará vixiado, controlado e multado, asi que non ten sentido vir ao areal con pás porque deberán dar a volta», advirte o alcalde, Juan González, que tamén apela a que cada grupo recolla o seu propio lixo. Nigrán pon en marcha un dispositivo de vixilancia sen precedentes para impedir que se caven grandes buracos durante a celebración, tal e como se informou na xunta local de seguridade que presidiu onte Abel Losada. A unidade Pegaso da Garda Civil, ampliada con axentes desprazados a propósito desde a unidade central de Madrid, vixiará con drons todo o areal e incluso as calas máis afastadas de Monteferro ou Lourido. O obxectivo da súa actuación desde primeira hora da tarde é a de detectar posibles grupos que, a pesar de as advertencias, desobedezan as normas.
Máis de 200 persoas entre Policía Local, Guardia Civil, Seprona, Policía Autonómica, GES, Protección Civil e axentes de Tráfico traballarán coordinados para que a festa transcorra sen incidentes e, sobre todo, para acabar co costume dos últimos anos de facer eses grandes buracos que danan o ecosistema. O Concello informou que Protección Civil controlará desde a mañá os diferentes accesos para que non se entre con pas, sachos ou material que sirva para facer buracos ou grandes fogueiras, informando á Policía Municipal no caso de que sexa necesario. Segundo advirte o goberno local, as sancións por desobedecer e facer fochas van dos 100 aos 3.000 euros en caso de ser multas leves e ata 200.000 de ser catalogadas como graves, «xa que poden estar a se infrinxir desde leis de conservación deste espazo natural protexido a leis de seguridade cidadá, podéndose incluso incrementarse moito a contía». A este dispositivo sumarase un equipo de concienciación ambiental que desde a mañá tamén estará a pé de praia lembrando os deberes que implica o respecto dun espazo natural e a mensaxe repetirase tamén por megafonía. Tamén asumirán a repartición de sacas aos diferentes grupos sacos para que depositen o seu lixo nos colectores que se dispoñan nos accesos ás praias.
A maiores, como vén sendo habitual, a zona deportiva de Gaifar contará cun hospital de campaña e un Punto Violeta de atención a posibles casos de violencia de xénero e, como cada ano, as dunas quedarán pechadas perimetralmente para impedir o paso e iluminadas para mellorar a vixilancia, con unidades do Seprona colaborando. A Garda Civil de Tráfico blindará o municipio con controis de alcoholemia para impedir que ninguén conduza baixo o efecto do alcol ou outras substancias, aspecto este último que vixiará especialmente a Policía Nacional.
«Traballamos para que a noite transcorra con normalidade, sen incidentes e sea a costume de facer buratos, e que, polo tanto, as fogueiras sexan as auténticas protagonistas da festa máis señeira de Nigrán», indicou o rexedor e explicou que autorizaron un total de 75 fogueiras no municipio.
«Levamos anos cunha campaña de concienciación pioneira en Nigrán e que inicialmente funcionou co tema do lixo, pero observamos que a costume de facer buratos medra, polo que se queremos preservar a nosa praia temos que chegar a este punto ao que non quixeramos ter que chegar, pero que resulta xa inevitable. Podemos facer ben a festa sen afectar ao noso ecosistema natural, non está reñido, e iso é o que debemos esixir», conclúe.