Hospitalizada a dona dun piso de Cangas por queimaduras ao intentar apagar un incendio no seu cuarto
CANGAS
Unha muller de 59 anos foi trasladada e houbo dous asistidos. Decenas de veciños quedaron confinados por precaución e para non respirar un denso fume nas súas vivendas
02 dic 2025 . Actualizado á 11:52 h.Unha propietaria, P.M.A., de 59 anos foi ingresada onte á noite nun hospital de Vigo tras sufrir queimaduras cando intentaba apagar un incendio nun cuarto do seu piso en Cangas. O lume calcinou un colchón que xerou un denso fume que saíu ás escaleiras do edificio e afectou a dous bloques con preto de medio centenar de vivendas no número 10 da avenida de Vigo. Outras dúas persoas tiveron que ser asistidas nunha ambulancia do 061 por inhalar fume. Decenas de veciños quedaron confinados por precaución dentro dos seus inmobles e outros saíron á rúa.
O incendio foi o luns, 1 de decembro, pasadas as dez e media da noite. Ao lugar acudiron os bombeiros do Morrazo e Protección Civil de Cangas.
O 061 enviou unha ambulancia asistencial de soporte avanzado e catro de soporte básico e persoal sanitario do pac de Cangas.
Foron atendidos tres pacientes. A dous déronos de alta no punto: tratábase dunha muller de 35 anos, A.M.C., e un home de 62 anos, R.M.V.