As preguntas dunha oposición a conserxe en Cangas: a lingua propia de Galicia é o náhuatl, o arameo ou o galego?
CANGAS
Algunhas respostas atribúen ao presidente da Xunta o poder de establecer o tempo de cocción do polbo ou o nepotismo como principio para elixir o persoal público
26 sep 2025 . Actualizado á 19:11 h.Cal é a lingua propia de Galicia, segundo o artigo 5.1 do Estatuto de Autonomía? Para responder a esa pregunta, o Concello de Cangas expón catro posibles respostas no exame de oposición a unha praza de conserxe: «A lingua propia (...) márcana as forzas de seguridade do Estado», «a lingua propia de Galicia é o náhuatl ou o tupi guarani no caso do Grove», «o arameo» e «o galego».
Non son as únicas respostas ocorrentes, e tamén moi doados de acertar, das 35 preguntas da proba.
A 21 expón que obrigación do Estado regula o artigo 9.2 da Constitución: «Organizar festas todas as semanas», «prohibir que as mulleres usen o transporte público», «promover as condicións para que a igualdade sexa real e efectiva», ou «obriga que todos vaian uniformados ao traballo».
A 15 pregunta se entre as obrigacións do presidente da Xunta recollidas polo Estatuto está establecer «un plan quinquenal que vele polo mantemento do eucalipto como árbore identificativa da comunidade», «establecer os tempos de cocción do polbo na Feira do Carballiño», «promover a loita contra o lume diferenciando claramente que son pedras e que é monte baixo», ou o presidente «dirixe e coordina a acción da Xunta e exerce a representación da Comunidade Autónoma e a ordinaria do Estado en Galicia».
Quizá a máis paradoxal, dado o contido do exame, sexa a pregunta 19, que se interesa polos principios que deben guiar a selección do persoal ao servizo das Administracións, e expón entre os posibles «o nepotismo», «o nicolaísmo», «o maniqueísmo», ou a «independencia, confidencialidade e discrecionalidad técnica na actuación dos órganos de dirección».
Fontes do PP consideran o contido da proba unha demostración de que o goberno tripartito de Cangas «non sabe nin facer un exame para unha praza». Pola súa banda, fontes do consistorio explicaron á axencia Efe que se trataba do segundo exame porque o primeiro foi anulado despois das alegacións dun dos participantes. Tamén afirmaron que ninguén acertou todas as respostas e xustificaron que a parte importante era a práctica, xa que a praza require destreza no mantemento das instalacións municipais.