«Non se pode mirar para outro lado ante unha situación tan alarmante», defende a senadora Nidia Arévalo
05 abr 2025 . Actualizado á 14:30 h.O Partido Popular anunciou a presentación dunha moción no Senado e unha Proposición Non de Lei no Congreso co obxectivo de reclamar ao Gobierno de España que actúe de forma inmediata ante a deterioración do río Miño. Entre as medidas que se demandan destacan o dragado da canle, a erradicación de especies invasoras e un control máis rigoroso do caudal ecolóxico, en colaboración con Portugal.
A senadora Nidia Arévalo e a deputada no Congreso Irene Garrido fixeron público este compromiso desde o Concello dAs Neves, onde mantiveron unha reunión co seu alcalde, José Manuel Alfonso, un dos máis activos na denuncia desta situación.
O rexedor explicou que «os alcaldes dos concellos da zona levamos tempo reclamando medidas ao Goberno central para frear a degradación progresiva do Miño. A sedimentación, as especies invasoras e os cambios bruscos no caudal están a afectar gravemente ao ecosistema e á economía local».
Entre os problemas máis graves sinalados por Alfonso está a acumulación de sedimentos, que impide a navegación nalgunhas zonas e afecta o ciclo vital de especies como a lamprea, o salmón ou a troita. Tamén mencionou a proliferación de fauna e flora invasora, como as algas, así como as variacións bruscas no nivel da auga provocadas polo baleirado de presas.
«Estamos a falar dunha problemática que está a ter un impacto moi importante no desenvolvemento socioeconómico de moitos concellos ribeiráns. A caída na produción de lamprea, por exemplo, non só supón unha perda ambiental, senón tamén un retroceso turístico e económico para os nosos municipios», destacou ou alcalde.
Nidia Arévalo agradeceu a implicación do rexedor dAs Neves e defendeu que «non se pode mirar para outro lado ante unha situación tan alarmante». Segundo explicou, as iniciativas do PP buscarán implicar ao Ministerio para a Transición Ecolóxica e coordinar accións co país veciño.
«Estamos nunha das zonas transfronteirizas máis activas da Unión Europea, clave para o turismo e a mobilidade laboral. É inxustificable que o Goberno central ignore esta realidade. A ministra Aagesen terá que escoitar ás voces dos territorios e actuar», defendeu a senadora.
Tanto Arévalo como Garrido subliñaron que esta petición xa foi aprobada no Pleno da Deputación de Pontevedra e replicarase en todos os órganos onde o Partido Popular teña representación.
«Alí onde haxa un senador, un deputado, un alcalde ou un concelleiro do Partido Popular, haberá alguén que defende o territorio, o medio ambiente e os intereses dos veciños», concluíu Arévalo.