O Sergas di que só o 7% dos traballadores de primaria de Vigo apoiaron o paro
27 nov 2025 . Actualizado á 13:44 h.A folga da atención primaria galega, que finalmente só convocaron a CIG e Omega, tivo onte impacto nos centros de saúde de Vigo e a súa área. Segundo os datos do Sergas (parciais, porque se calculan incluíndo ao persoal de servizos mínimos e vacacións), o 7% dos traballadores foi á folga. O sindicato médico Omega elévao ao 80% no caso dos facultativos. «Nalgúns centros de saúde, como Colmeiro ou Lavadores, só traballaron un ou dous médicos», asegurou o presidente da central, Manuel Rodríguez Piñeiro, que explicou que «a folga ten menos seguimento entre a xente de máis idade». Do paro desmarcáronse CC.OO., UGT, CSIF e Simega.
O conflito nace das medidas que Sanidade quería implantar en atención primaria, como a extensión da figura do facultativo especialista de área (un médico de centro de saúde que, ademais, fai dous gardas ao mes nun PAC) a todos os novos contratos ou a convalidación do título de especialista a estranxeiros coa especialidade sen homologar. En canto se convocou a folga, Sanidade retirou estes puntos.
O paro continúa hoxe e mañá. Omega confía en que o seguimento creza. «Hai habido moita confusión porque a xornada de hoxe [por onte] estaba marcada pola retirada de Simega», dixo Piñeiro, en relación ao outro sindicato médico, que ao principio apoiaba a folga pero que negociou algúns puntos co Sergas e acabou retirándose na noite do martes.