O colectivo LGTB+ sae ás rúas da cidade para reivindicar os seus dereitos
01 jul 2025 . Actualizado á 01:15 h.O orgullo é unha noviña, andando soa pola peonil do Calvario, envolvida nunha bandeira do arco da vella. Tamén é o ritmo da inevitable batucada que marca o paso dos manifestantes. Pero, sobre todo, é posicionamento ante a vida. O colectivo LGBT+ de Vigo saíu á rúa para manifestar os seus sentimentos e mostrar a gran diversidade que caracteriza á especie humana. Tamén se colo o ataque de Israel a Gaza na manifestación do Orgullo crítico convocada en Vigo por Avante LGBT+ e a asociación Nós Mesmas. A organización quixo deixar clara a súa postura de apoio ao pobo palestino e o seu rexeitamento á acción violenta de Israel coa presenza de dúas bandeiras palestinas na pancarta de cabeceira. Pero, a reivindicación principal recaeu novamente nos dereitos do colectivo LGTB+ e o rexeitamento aos ataques e discursos de odio que reciben ante calquera avance ou no normal transcorrer das súas propias vidas.
«Eses discursos están aumentado desde os partidos de extrema dereita e dereita; aumenta nas políticas que aplican a nivel municipal en moitas partes do Estado. Aquí, en Vigo, tamén detectamos os discursos de odio, incluso por parte de colectivos que aparentan ser feministas. Aínda o sábado pasado, fixeron unha concentración en Vigo en contra da Lei trans, dicindo que é anticonstitucional, anticientífica e que fai ideoloxía de xénero», explicou, antes da manifestación, Elisabet Pérez, do colectivo Nós Mesmas, entidade convocante da marcha.
«A cuestión é que cando as minorías acadamos dereitos pódese percibir como un ataque aos privilexios das maiorías, pero non é así; hai que recordar que cando falamos de dereitos do colectivo non son para poñernos por amais senón para igualarnos. Falamos de dereitos humanos, como o dereito a identidade que a temos todas as persoas a excepción das persoas trans en moitos sitios, e aquí conseguiuse hai só dous anos», concluíu.
A manifestación transcorreu desde o cruzamento de Urzaiz con Gregorio Espino ata a Porta do Sol, onde persoas da organización convocante leron o manifesto no que concentraron as súas reivindicacións e posicionamentos actuais. Co característico ritmo de batucada, a caravana reivindicativa lanzou diversas proclamas para explicar o seu xeito de ver certas cuestións. E eses diversos xeitos de entender a vida materializáronse na enorme variedade de bandeiras que concorreron á manifestación. Hai de todas as cores, pero todas reclaman o mesmo.
Na cabeza da manifestación situouse unha pancarta na que se podía ler: «Orgullo crítico LGTB+ Vigo. Liberdade para ou pobo, orgullo e loita. De aí cara atrás a variedade de lema era case un asunto. Unha tiña moita ironía. «Ensináronme a que hai que comer de todo», expresaba unha. «Ao fascismo combátese con orgullo», afirmaba outra. «O meu fillo/a/e o meu orgullo. Nais e pais fóra da armario», aínda podíase ler noutra.
A representación política quedou reducida a unha representación de Sumar, o BNG e a súa organización xuvenil Galiza Nova. Estiveron os nacionalistas representados polo seu portavoz municipal, Xabier P. Igrexas, e polo deputado no Parlamento de Galicia, Brais Rúanova, xunto a outros cargos orgánicos e institucionais e militancia nacionalista da comarca. Tamén se puideron ver símbolos das centrais sindicais UGT e CC.OO.
Festa na Porta do Sol
No arranque da manifestación reuníronse uns centenares de manifestantes, aínda que así como ía achegándose á Porta do Sol foi ampliándose o número de persoas. «Pasa todos os anos o mesmo», exclamaba unha moza que cumprira co inicio da manifestación no cruzamento de Urzaiz con Gregorio Espino.
Xa unhas horas antes do inicio da manifestación, estaba prevista na Porta do Sol unha serie de actividades relacionadas coa xornada. Música de picadiscos e talleres de pintacaras animaron as primeiras horas da tarde. E tras o final do percorrido reivindicativo, a festa continuará coa música das dj's LaKeNoBaila e Mambis e o espectáculo das drags Escarlatina Pier, Ketty Pin e Aymar Note. O elenco de artistas complétase coa presenza de Dafne.