O autor modificou unha antigo aparello de chicles e agora despacha obras nA Colectora
13 may 2025 . Actualizado á 11:14 h.Os expertos levan tempo advertindo de que o mercado da arte necesita novas vías de comunicación para chegar ao público. Pois desde onte, no espazo A Colectora (Eduardo Iglesias, 11) púxose en marcha un xeito curioso de difundilo a través dunha vella máquina expendedora de chicles. O aparello, un obxecto que forma parte da cultura contemporánea, ou máis ben da vintage, foi modificado por Rafa Calchadora para difundir o seu traballo.
O artista conta que con esta iniciativa rescata unha idea antiga que tivo a súa muller hai anos, nunha exposición no Museo Municipal en Ourense. «Mentres se desenvolvía ocorréuselle o da expendedora e fomos madurando a idea que derivou noutra. Como alí hai polbeiras por todas partes, eu utilizaba como soporte para pintar pratos de polbo e o plan era que os vendese unha pulpeira, pero era un balbordo burocrático do 15 e refugámola», conta. Anos despois descubriron que a idea non era tan orixinal, que xa había unas cantas máquinas expendedoras de arte e aí quedou o asunto ata que recentemente se topou nunha web de obxectos de segunda man con este artefacto. «Volveu á miña cabeza aquel proxecto, pero cun engadido, non só despachar arte, senón facelo accesible e que a xente, cun simple euro, teña acceso a unha pequena obra de arte», relata.
Para iso, o que ideou é un sistema con paus. «Botas a moeda e baixa un pau en forma de comprimido de chicles que pon o que che tocou. Se sae branco, é unha postal para elixir entre dous modelos, un de retranca galega e outro da Catedral de Santiago. Se sae vermello é unha obra impresa, pero selada e asinada, a elixir entre unha miña ou outra de Álpez, unha artista de Nova York que prefire estar no anonimato. E a quen lle saia o pau negro levará unha obra orixinal de ningún dos dous.
Leticia e Saúl, os responsables desta tenda de moda, galería e coworking con cafetería, acollen a idea sine die. Por agora, o experimento nA Colectora non teñen data de finalización e Calchadora tampouco descarta abrilo a outros autores máis adiante. Calchadora insiste en que a iniciativa non está pensada cun fin lucrativo senón para achegar a creación doutro xeito engadíndolle un chisco de sorte e intriga con arte «expendida».
Mentres tanto, o ourensán residente en Moaña prepara outra mostra na Capela do Hospital, en Cangas: «Levo 30 anos facendo exposicións e non se parece en nada ao que estaba a facer, é moi tola», avanza sobre a mostra que abrirá a principios do mes de xullo.