Un vigués líbrase de pagar un recibo de 5.158 euros pola auga: «Acusábanme de roubala»

Un veciño da parroquia de Beade acaba de librarse de pagar máis de 5.000 euros que lle esixían o Concello e a empresa concesionaria do servizo de auga por unha suposta conexión ilegal. Así o resolveu o Xulgado do Contencioso-Administrativo número 2 de Vigo nunha sentenza. O fallo estima integramente o recurso interposto polo abonado ao que a concesionaria acusaba de roubar a auga e quixo cobrarlle coma se a billa estivese aberto as 24 horas do día durante un ano.

O problema, segundo explica Antón, xurdiu durante unha inspección para o cambio de contadores. «Os veciños fixeramos unha traída e había unha instalación antiga. Tiña un baypass anulado, pero debía estar deteriorado e, cando fixeron probas de presión, había un pequeno retorno. Concluíron que había unha derivación e que estaba a roubar a auga», relata. A visita técnica, realizada por FCC Aqualia Vigo UTE, acabou en xullo cunha liquidación de 5.158,52 euros. Segundo o expediente, detectouse unha derivación de caudal non autorizada na acometida da súa vivenda. O Concello considerou que existía unha conexión fraudulenta á rede de abastecemento e reclamou esa cantidade por consumo indebido. O afectado recorreu a resolución por vía xudicial. Alegou que a derivación sinalada non estaba en uso e pertencía a unha antiga instalación asociada á comunidade de montes de Beade. Subliñou, ademais, que foi el mesmo quen pediu a Aqualia que revisase a instalación por unha fuga de auga. O xuíz considerou este xesto contrario ao de quen trata de defraudar. A sentenza desmonta a tese da conexión ilegal. O maxistrado conclúe que non se acreditou que o recorrente usase a antiga derivación nin que actuase con mala fe.

 Consumo baixo

Ao contrario, sinala que os consumos rexistrados eran propios dunha vivenda unifamiliar. «Imputáronme un consumo continuo durante 24 horas e, para calcular o que debía, mediron o diámetro da tubaxe. Pero eu vivo só, non teño piscina nin regas. Nunca tiven un consumo alto», afirma Antón. O xuíz tamén aprecia indicios de caducidade na tramitación do expediente sancionador. En consecuencia, anula a resolución municipal do 5 de xullo do 2024 e exonera o veciño. «Estou acostumado lidar con situacións complicadas e uso a intelixencia para resolvelas. Non me preocupa en exceso cando miro o problema e vexo que podo con el», di Antón. A sentenza, que non é susceptible de recurso, tamén acorda que non haxa imposición de costas, polo que o abonado deberá custear os gastos xudiciais que dedicou a defenderse.

O Concello e a concesionaria xa recibiron a notificación para deixar sen efecto a factura, e a resolución comunicouse ao servizo de recadación executiva

---

---

---