Persoal e goberno local veranse o martes para a mesa de negociación
22 jun 2024 . Actualizado á 05:00 h.A precariedade do persoal de bombeiros, que motiva segundo os mesmos traballadores inseguridade na cidade, dilucídase nunha negociación entre os sindicatos e o goberno local para acadar un acordo entre ambas as partes. O martes está convocada a mesa de negociación para tratar as posturas, por agora bastante enfrontadas. A acta doutra reunión igual celebrada o mes pasado inclúe as propostas dos bombeiros, resumidas en dez puntos que implican a cobranza de salarios atrasados e ampliar o persoal para ampliar a seguridade da cidade máis poboada de Galicia.
Ofertas de emprego atrasado correspondente aos anos 2021, 2022 e 2023. Os funcionarios esixen axilizar os trámites e convocalas prazas. Lembran tamén na súa proposta que «os primeiros interinos acaban en setembro os tres anos e entrarían en fraude de lei se continúan e non está convocada a oferta, coa consecuencia da redución de efectivos».
Especificar as bases dos procesos selectivos. Tanto a parte teórica como a física. A día de hoxe están aprobadas en Junta de Gobierno Local unhas bases con multitude de erros, explican os bombeiros, «e non se sabe se se publicarán as mesmas ou outras con probas diferentes. Isto ocasionaría prexuízo para o persoal que queira acceder a esas prazas, ao non ser coñecedores dos temas que teñen que estudar ou os exercicios físicos para adestrar».
Subida da relación de postos de traballo (RPT). É outra petición dos bombeiro, que xustifican a demanda con «o necesario que é reforzar o servizo para dar unha resposta con garantías e poder dar cobertura a máis intervencións que van en beneficio da cidadanía».
Dereitos atrasados. Os bombeiros requiren ao goberno local «aclarar a forma de gozar as vacacións de anos anteriores, xa que desde a xefatura do servizo, este ano estanse denegando as atrasadas e facilitando soamente o goce das do ano 2024». A formulación dos funcionarios lembra que «as vacacións atrasadas xa foron pospostas por decreto en 2023, e novamente pospostas en 2024. As vacacións son un dereito innegociable e irrenunciable, polo que non poden denegarse constantemente».
Salarios sen pagar desde o 2021 e a funcionarios xa xubilados. Os bombeiros solicitan igualmente o «pago de calquera tipo de hora atrasada desde o ano 2021. Hai persoal ao que se lle debe desde decembro de 2021 e incluso a persoal xubilado». Tamén se reclama o pago de Noiteboa e Nadal do persoal que traballou eses días nos anos 2021 e 2022, e é de obrigatorio cumprimento por convenio, lembran os sindicatos.
Pautas de horario. A sexta reivindicación implica solicitar un modelo para xestionar e aplicar as 35 horas semanais de traballo. Ponse de referencia a casuística dos bombeiros de Badaxoz porque teñen as mesmas xornadas que Vigo.
Máis débedas ao persoal, estas do 2022. Os bombeiros reclaman tamén pagos atrasados de hai dous anos. Corresponden a xornadas de verán que o Concello lles debe a maiores das xa citadas.
Postos de mando non recoñecidos. É común no persoal de bombeiros, pola falta de persoal, que bombeiros realicen labores que non lles corresponden, ou que asuman postos de mando sen ter a acreditación oficial. É por iso que o persoal reclama ao goberno local encoméndaa « de funcións temporais para o persoal que está a realizar funcións superiores ás que lle corresponden».
Equipararse aos concellos maioritarios en España. Os bombeiros reclaman unha petición que vén de lonxe. Implica a reclasificación ao grupo Cl dos funcionarios. Engaden que a maioría dos concellos de España xa teñen realizada esta reclasificación.
Vigo segue sen grupo o rescate acuático. A última reclamación dos bombeiros tamén vén de lonxe. Implica reactivar do grupo de rescate acuático, xestión de socorrismo e servizo para realizar en praias. «Desde o ano 2010 hai unha sentenza que obriga a convir co porto, previa negociación do cambio das condicións laborais do servizo. Van 14 anos incumprindo esa obrigación. A sentenza, ademais, insta a que mentres non exista o convenio, actúese por solidariedade».