Implantará os sistemas de elevación dun parque no norte de Francia
07 may 2023 . Actualizado á 02:10 h.Industrias Ferri amarrou un novo contrato cunha multinacional de Dinamarca para un proxecto de enerxía eólica mariña. A fabricante de equipos para o sector naval fornece os sistemas de elevación dun novo parque que se desenvolve en augas de Normandía, ao norte de Francia.
A empresa viguesa afincada no polígono da Pasaxe colaborará coa compaña danesa, país que se considera un dos grandes os pioneiros da xeración de quilowatts procedentes do mar. Industrias Ferri dotará ao novo parque eólico dos sistemas que facilitan a subida de materiais e persoas para realizar boa parte das tarefas de mantemento das estruturas.
Fai máis dunha década que a empresa capitaneada por Patricio Fernández-Goberna comezou a desenvolver proxectos no ámbito da enerxía eólica offshore. A súa primeira aproximación neste ámbito foi no Mar do Norte. Desde entón, traballaron na subministración de equipos para plataformas fixas, que son as que se ancoran directamente ao leito mariño. En canto ás flotantes, Ferri desenvolveu sistemas de posicionamento en varios prototipos e parques precomerciales de Europa. Entregaron a maquinaria de sistemas de amarre e ancoraxe que permite a instalación de plataformas en augas «con maiores recursos eólicos», indican. As augas da plataforma continental da península ibérica, por exemplo, son moi profundas.
Con dez anos de experiencia, Industrias Ferri enfronta o bum da eólica mariña como produtor de primeiro nivel. De feito, o sector que aproveita o vento de alto mar xa representa un terzo da actividade da empresa, que facturou preto de 11 millóns de euros no 2021, segundo as últimas contas publicadas. Calculan que boa parte dos proxectos de eólica flotante a nivel mundial empregan algún tipo de maquinaria desenvolvida na Pasaxe, como elementos de fondeo, posicionamento ou manexo de cargas. A patronal do metal, Asime, sostén no seu informe anual que o sector naval poderá galego poderá recuperar posicionamento a nivel nacional nos próximos anos se asume o desafío de construcións para eólica mariña.
Outra das tecnoloxías desenvolvidas pola empresa son as solucións de monitoraxe remota e control remoto dos equipos, «que permite verificar o seu estado antes de calquera intervención, reducindo os custos de mantemento», aclaran. A maquinaria que exportan ata puntos estratéxicos para a eólica mariña en Europa están adaptados ao ambiente no que se instalarán e equípanas con tecnoloxías de tratamento superficial «que permiten unha vida útil de máis de 25 anos».
Á espera de que as administracións aceleren o paso para que os parques eólicos do mar sexan unha realidade, Ferri acaba de incorporar na súa oferta tecnolóxica o xemelgo dixital. «Esta ferramenta permite coñecer o estado dos equipos nun modelo dixital desde as estacións de control do parque eólico», detallan. A súa implementación facilita a planificación e optimización do mantemento e as operacións.