Foi finalista no concurso do auditorio no 2001, pero gañou César Portela
09 mar 2023 . Actualizado á 21:25 h.O arquitecto británico David Chipperfield, flamante premio Pritzker 2023, foi un dos cinco finalistas do concurso para realizar o auditorio de Vigo sobre a fábrica de Casa Mar. O británico chegou a visitar o edificio o 26 de xaneiro do 2001, para coñecer de primeira man o espazo sobre o que había que intervir. Pero o seu proxecto non prosperou. Gañou o pontevedrés César Portela e a cidade quedou, finalmente, sen unha obra da que presumir do novo óscar da arquitectura mundial.
Aquel día, sobre as ruínas do antigo imperio de Casa Mar, Chipperfield fixo un percorrido que lle levou a concluír que se trataba dun inmoble singular. «Non é un edificio moi bonito, pero é forte, ten presenza e desprende enerxía», manifestou. Foi unha xornada chuviosa e as gaivotas sobrevoaban o porto. Acompañáballe o arquitecto barcelonés Fermín Vázquez, cuxo estudo colaboraba na proposta de deseño do futuro palacio de congresos. Este adiantou que era un pouco pronto para definir a proposta. A cuestión era concretar que merecía a pena conservar, aínda que finalmente se viu que practicamente nada. A proposta do concurso era máis ambiciosa do que realmente acabou sendo o auditorio Mar de Vigo, que sufriu un corte polos custos. Naquel momento falábase dunha superficie total de 25.000 metros cadrados.
David Chipperfield foi o único arquitecto internacional entre os finalistas que optaron á obra. Santiago Calatrava quedara finalista, pero retirouse por sorpresa. Francisco Mangado, Jaime González Valcárcel e o vitorioso Portela eran os outros.
Así que a lista de proxectos frustrados de premios Pritzker con Vigo segue engordado. Non prosperaron no seu momento o do brasileiro Paulo da Rocha para o campus universitario, nin o do portugués Álvaro Siza para un auditorio en Samil ou o de Aldo Rossi para o Museo do Mar (Portela fíxoo recuperando ideas do italiano, xa falecido). Tampouco foron adiante o do francés Jean Nouvel para a reordenación do porto e de Rafael Moneo para o novo Concello na Praza do Rei. Si prosperou o de Thom Mayne para a estación do AVE en Urzaiz, aínda que a obra sufriu un forte recorte e o deseño do norteamericano quedou un tanto desvirtuado.