O local vigués renova por terceiro ano consecutivo o seu lugar na lista dos mellores bares de España e Portugal que elabora a plataforma Top Cocktailbars
31 ene 2023 . Actualizado ás 05:00 h.Por terceiro ano consecutivo, o Vitter Bar de Vigo entra a formar parte da exclusiva listaxe que elabora a plataforma Top Cocktailbars, no apartado no que seleccionan os mellores bares de España e Portugal. «É unha coctelería urbana, ampla e sinxela onde se desenvolve unha oferta de produto semellante ás coctelerías de grandes cidades como Londres, Nova York, Roma, Berlín...», destacan na web que os recoñeceu e da que non saen desde que o local vigués situado na rúa Alfonso XIII, 32 entrou a formar parte da lista no 2021. A distinción ratificouse a pasada fin de semana durante a celebración da feira gastronómica Madrid Fusión e ademais, queda sos no podio de Galicia, xa que é o único establecemento da comunidade galega que se inclúe no ránking das mellores barras de coctelería de calidade.
A historia do Vitter Bar, que cumprirá cinco anos en abril, é a de tres amigos e compañeiros de estudos que decidiron apostar por esta especialidade con poucos practicantes no sector da hostalería. Os vigueses Marcos Tapia e Fernando Fernández, xunto ao coruñés Antonio Balboa, iniciaron xuntos a súa primeira aventura empresarial propia despois de traballar en bares doutros países. O trío de socios coincidiu nas aulas e os fogóns do Centro Superior de Hostalería de Galicia, en Santiago, pero ao rematar os estudos tomaron camiños diferentes. «Fernando e eu fómonos a Londres e Marcos a Australia», conta Balboa.
En Vitter Bar practican unha coctelería baseada máis no produto que no espectáculo. Como explican, foxen do rebuscado e o floreo, aínda que fan un pouco de todo para dar servizo ás demandas da clientela, «algúns combinados máis comerciais e moitos clásicos», pero tamén as súas propias creacións e as variacións que lles solicitan, con exemplos como o cóctel white russian que se tomaba Jeff Bridges facendo do menda no filme O gran Lebowski. Este ano estrearon carta e nela hai propostas como A pomba (tequila, mezcal, lima, agave, soda de pomelo); o amaretto sour, que foi a proposta de decembro; seguido co cambio de ano dun combinado con Aperol Spritz. Para probar as súas mesturas hai que axustarse ao seu limitado horario, xa que só abren os venres e os sábados de 19.00 a 03.00 horas.