Os moañeses estiveron lonxe do título, que foi para Getaria e con Pedreña terceira
02 ago 2021 . Actualizado ás 05:00 h.Samertolameu logrou o seu obxectivo para o Campionato de España celebrado onte en augas de Castro Urdiales e subiuse ao podio, concretamente, ao segundo caixón. Nunha cita descafeinada debido á ausencia dos conxuntos da máxima categoría, que tiñan esta fin de semana competición de ACT e que na súa maioría non tiñan intención de acudir ao Nacional, os de Dani Pérez aproveitaron a súa oportunidade, pero Getaria puxo o ouro demasiado caro e os moañés quedaron lonxe do triunfo.
A embarcación vasca proclamouse campioa de España cun tempo de 20:43,73 e máis de dez segundos de vantaxe sobre o conxunto galego, que investiu 20:54,93 e que tivo a Pedreña axexando ata o último instante. De feito, os cántabros dispuñan dunha vantaxe de seis segundos ao paso pola primeira ciaboga, pero déronlle a volta á situación pasando un segundo antes a segunda e facendo a terceira viraxe con dúas de antelación sobre a súa máis inmediato perseguidor. Menos dun segundo separoulles no momento de acadar a meta.
Arkote estivo case sempre moi lonxe dos postos de privilexio e acabou marcando un tempo de 21:17,91, peor mesmo que o dun dos participantes na final B. Mantivo o tipo no primeiro longo e mesmo fixo a primeira viraxe un segundo antes que Samertolameu -último da final nese punto-, pero foi de máis a menos, ao contrario que os moañeses.
Na final B, Kaiku marcou o mellor tempo, 21:12,23, que lle valeu o cuarto posto na A. Competiu xunto con Castrexa, que quedou moi lonxe cun rexistro de 21:23,93.
A través das redes sociais, Samertolameu mostrou a súa satisfacción por este éxito. «Conseguimos un excelente segundo posto e a medalla de prata para vos nosos! Grandes!», indicaban. A semana que vén retomarán a Liga Galega A, na que marchan líderes con 94 puntos, cinco máis que Bueu, o equipo que gañou as dúas únicas regatas nas que non se impuxo Samertolameu, segundo en ambos os casos.