O detido utilizaba xustificantes falsos de transferencias bancarias
01 ago 2021 . Actualizado ás 21:06 h.Un veciño de Vigo foi acusado como autor de polo menos 23 delitos de estafa cometidos en diferentes establecementos comerciais. Segundo as investigacións da Garda Civil, 17 dos comercios afectados están repartidos entre sete localidades do sur da provincia: Vigo, As Neves, Ponteareas, O Porriño, A Cañiza e Cangas. O presunto estafador pagaba o importe dos artigos cun xustificante falso de transferencia bancaria. A Garda Civil data a primeira fraude realizada no pasado mes de maio. O montante total que tería obtido dos delitos ascende a 102.244 euros.
Segundo as investigacións realizadas, o home dedicábase fundamentalmente á compra de maquinaria agrícola, ferramentas e maquinaria audiovisual para a celebración de espectáculos públicos. Posteriormente, vendíaos en establecementos de compravenda de obxectos de segunda. A pesar de que boa parte do material que comprara de forma fraudulenta xa acabara en mans dun terceiro, a Garda Civil conseguiu recuperar diversas ferramentas agrícolas, así como un tractocamión ou o semirremolque dun escenario. Tras rematar as investigacións e instruír dilixencias, o acusado, que conta cun amplo historial de antecedentes penais, deberá comparecer no xulgado de instrución de Ponteareas proximamente.