O equipo coruñés quere o préstamo do extremo internacional sub-19, que pertence ao Newcastle, xoga cedido en Bélxica e ten outros clubs pendentes
27 nov 2025 . Actualizado á 23:28 h.O Deportivo pretende incorporar no próximo mercado de inverno ao novísimo talento Antoñito Cordero. Nado en Jerez de la Frontera en novembro do 2006, é un atacante criado no Málaga que o pasado verán asinou libre polo Newcastle inglés ata o 2030. Agora milita cedido no Westerlo belga, onde apenas xogou nos primeiros meses desta tempada.
A ambición do Dépor por ascender a Primeira División leva a botar as redes sobre un futbolista que xa demostrou o seu carácter diferencial na categoría de prata do fútbol español e que incrementaría o actual poderío atacante branquiazul. A operación non resultará sinxela, pois hai moitas miradas fixas neste xogador e, ademais, o club coruñés, que negocia a súa cesión, ha de pór de acordo tres partes: as ansias desta perla, sen máis participación que en seis partidos (ningún de titular) deste primeiro período de tempada; as expectativas do club dono dos seus dereitos, que aspira a que o seu xogo siga evolucionando, así como as daquel que se fixo co préstamo dunha das máis importantes promesas do Vello Continente.
A posible chegada do mozo extremo, adiantada por Cope Coruña, non é a única que o Deportivo persegue. Xa era coñecido o interese do club por fortalecer a liña defensiva coa incorporación dun novo xogador que palíe a baixa por lesión de Ximo Navarro, á vez que sexa capaz de achegar solvencia nesa dobre función de lateral e central dereito do esquema de Antonio Hidalgo. Pero o interese por un reforzo da dimensión do exfutbolista do Málaga supón todo un golpe na mesa.
Cordero pasou polas categorías inferiores do Cádiz, o Sevilla e o Betis antes de que debutase, con só 16 anos, no inicio da tempada 2023-2024 no club costasoleño, que militaba en Primeira Federación. Destro, pero envorcado á banda esquerda, do modo que tamén xoga Yeremay e como David Mella formouse na canteira do Dépor, acabou anotando o gol que deu ao Málaga o ascenso a Segunda División. Xa na categoría de prata seguiu marcando diferenzas. O seu rendemento foi incontestable: 7 goles e 9 asistencias nos 60 partidos que disputou nesas dúas tempadas.
Internacional coa selección sub-19, chegou á final do último Europeo onda compañeiros de xeración como o céltico Óscar Marcos, Pablo García (Betis) e Jan Virgili (Mallorca). Pero descartou renovar o seu contrato co Málaga e, a primeiros do pasado mes de xullo, desembarcou no Newcastle, un dos novos ricos do fútbol inglés, que está a disputar a Champions por segunda vez nas tres últimas tempadas.
O seu director deportivo, Paul Mitchell, presentou a Cordero como «un talento apaixonante. Estamos encantados de traelo ao Newcastle United, dado o interese que esperta en España e en toda Europa. Ten moito potencial, e a seguinte fase do seu desenvolvemento será que o club seleccione un préstamo que o desafie e aproveite a súa experiencia», engadiu.
«Son unha persoa á que lle gusta aspirar todo o máis alto. Por que non vir a un dos mellores lugares do mundo para facelo?», afirmou entón o xogador, no que o Deportivo se fixou para dar un novo salto de nivel no persoal.