O gol do canteirán desbarata a maldición que acompañaba ao Deportivo en Ferrol, onde non gañara nin marcara nos seus tres últimas visitas
29 mar 2025 . Actualizado á 22:24 h.Era imposible que fose outro. Yeremay deu ao Deportivo os seis puntos contra o Racing. Os tres deste sábado nun abarrotado estadio da Malata sumáronse a aqueles do inicio de Liga no choque de Riazor, cando tamén marcara o canteirán. Non hai maldición nin encantamento que poida co seu xenio, ese chispazo previo á carreira decisiva, o duelo de miradas co gardameta e o remate cruzado á rede. Todo, en só catro segundos de xogada que se mascaron en silencio nunha abarrotada A Malata. Como o desenlace dunha avalancha imposible de evitar. Foi o seu undécimo gol nunha tempada de conto, a primeira que está a completar na elite.
Así chegou o final dun nefasto refacho do Deportivo, que non gañara, nin tan sequera marcado, nos tres duelos xogados en Ferrol desde que el e o Racing compartiron a terceira categoría. Unha derrota por 1-0 e dous empates sen goles, agora enterrados polo talento de Yeremay. Nunha posición diferente á habitual, pois na Malata partiu case sempre desde a banda dereita, non pasaran tres minutos cando fixo un centrochut coa zurda, a súa perna menos boa, ao que Zakaria non chegou por un suspiro.
Pouco despois, no gol, culminou coa dereita unha xogada de catro toques do Deportivo. O corte de Tosic, a prolongación de José Ángel a Vilares e o fenomenal pase filtrado deste á carreira do 10. A súa celebración, dividida en xestos: primeiro, os brazos abertos; logo, a man á orella; despois, os dedos ao ceo; ao final, o bico á bancada.
Aínda xutou outro par de veces, antes do descanso e despois, co seu equipo achicando auga en defensa, pero sempre ás luvas de Yoel. Das botas do deportivista, renovado fai só un par de meses ata o 2030 tras os cantos de sirena do mercado de inverno, tamén saíu o córner que o porteiro do Racing, quizá cegado polo sol, introduciu en propia meta, pero o árbitro anulou. Era outra mostra de que contra o encanto que esperta o canario non hai feitizo que valla... ata que aparece o VAR. Neste Dépor canarinho, en homenaxe ao país dos Mauro Silva, Bebeto e Djalminha, non hai máis nada máis brasileiro que o talento de Yeremay.