O técnico balear avisou de que o Mallorca non se vai a dar por vencido no encontro de volta
21 jun 2019 . Actualizado á 07:21 h.O adestrador do Mallorca non dubidou en lembrar ao Dépor que quedan aínda noventa minutos por xogar. «Indubidablemente é un resultado que non queriamos. Cun menos tampouco é que sufrísemos demasiadas ocasións, pero é unha pena, porque é un resultado moi favorable para o rival. Pero confío nos xogadores que temos e ímolo a pelexar. É certo que en fronte tivemos a un moi bo equipo, pero con estes xogadores imos intentar, o estadio vai empurrar, e se queren pasar, terán que sufrir», avisou Vicente Moreno.
O preparador do equipo bermellón falou das posibilidades do seu equipo de remontar a eliminatoria. «O equipo debe centrarse en marcar un gol e que eles non marquen, claro. Xa antes todo o mundo daba por anticipado que subirá o Dépor, pero imos xogar o partido e a ver que pasa. A ilusión e as ganas, a fame e a ilusión moven máis que outra cousa. E este equipo teno», engadiu.
Moreno evitou entrar en polémicas coa acción do segundo gol. «Non me querería ver no pelello do árbitro nun partido como leste. Protestabamos porque o linier levantou a bandeira e quedou parado. Que se vise gol, tiña que correr», dixo. No entanto, en caso dun gol dubidoso, o regulamento di así: «Cando se marcou gol, pero non exista a certeza de que o balón atravesase completamente a liña de meta, o árbitro asistente primeiro deberá levantar o banderín para atraer a atención do árbitro e despois confirmará o gol».
