Os pescadores queren que os protexan porque «se eu non produzo, ti non comes»

Coa mensaxe «Se eu non produzo, ti non comes», o sector pesqueiro español reivindicou este martes en Vigo protección para seguir fornecendo aos consumidores produtos sans, nutritivos e con probados beneficios para a saúde, a sociedade e o medio ambiente. A Asociación de Organizacións de Produtores Pesqueiros Pesca España recalcou a relevancia socioeconómica e para os consumidores de todos os que fan posible que o peixe chegue do mar ás mesas, reivindicando frear a competencia desleal de importacións que seguen entrando na Unión Europea a pesar de que non todas cumpren os mesmos requisitos que se lle esixen á produccción da flota comunitaria.

Durante o foro «O sector pesqueiro en España: da realidade ao metaverso», Javier Garat, secretario xeral de Cepesca e presidente de Pesca España, avogou por limitar as importacións a países que cumpran estándares que se aplican en Europa, algo que «non está a suceder na actualidade». «A nosa intención é protexer ao sector pesqueiro. A Comisión Europea debería recoñecer e apoiar os sacrificios realizados por este sector nos últimos anos. Estes esforzos levaron á explotación sostible da maioría das poboacións de peixes», indicou.

Javier Touza, presidente da Cooperativa de Armadores do Porto de Vigo (Arvi), puxo o acento en que os produtos capturados nunha contorna natural teñen moi baixo impacto ambiental ao non requirir alimentación artificial nin subministración de auga, polo que o peixe «salvaxe» se converte na opción máis favorable en termos de seguridade alimentaria e preservación do medio ambiente.

Guillermo Aldama, cardiólogo do Hospital Universitario da Coruña e médico de cabeceira da pesca española subliñou as acreditadas vantaxes da dieta mediterránea, na que o peixe xoga un papel fundamental como fonte de proteínas e acedos grasos insaturados omega 3. Grazas a eses hábitos nutricionais e á inxesta regular de produtos do mar, España é un dos países con maior lonxevidade e calidade de vida no mundo, subliñou no relatorio.«Peixes e mariscos, existe algo máis san?».  

Durante a mesa redonda «A importancia da cadea de valor da pesca para a soberanía alimentaria da Unión Europea», Yobana Bermúdez, de Conxemar , asociación de produtos do mar conxelados, indicou que os consumidores deberían de estar mellor informados os produtos e a súa orixe, os beneficios para a saúde que implica consumilo e os esforzos do sector pola sustentabilidade e a responsabilidade».

Felicidade Fernández, responsable de Comercio, Internacionalización e Promoción de Anfaco-Cecopesca, advertiu de que é «un momento de especial dificultade» polo descenso do consumo e os desafíos de natureza económica e ambiental que afronta o sector, polo que considerou «indispensable dispor dunha industria de transformación e conservación de peixes e mariscos forte, consolidada, en beneficio da soberanía alimentaria».

Nun debate no que tamén interveu Antonio Nieto, xerente de Pesca España, Basilio Otero, presidente da Federación Nacional de Confrarías de Pescadores, Basilio Otero, lembrou que «un 70 % do peixe que se consome na Unión Europea provén de países terceiros», dato suficientemente elocuente como para esixir á Comisión Europea que coide ao seu sector pesqueiro ou, pola contra, a dependencia das importacións porá aínda máis en xaque a alimentación dos cidadáns dos Vinte e sete.

Durante o foro organizado por Pesca España na sede de Arvi tamén se analizaron outras inquietudes da pesca, como a falta de man de obra e de substitución xeracional, a loita contra a pesca ilegal non declarada e non reglamentada, os sobrecustos ou a preocupante diminución do consumo de produtos do mar nos fogares españois.

---

---

---