Unha baliza percorre 6.000 quilómetros entre a costa este de EE.UU. e a praia de Nemiña, Muxía

Unha enorme baliza utilizada para sinalizar os accesos e saídas dos portos apareceu na mañá deste martes na praia de Nemiña, en Muxía. As ondas deixárona encajonada contra as rocas, no chamado Furado Grande da Punta do Almacén. 

Un dos seus descubridores foi Amador Vilela Ferrío, exresponsable da agrupación de percebeiros do depósito muxián. Segundo el trátase dun dispositivo pertencente á Garda Costeira dos Estados Unidos, tal e como indicaría a placa identificativa deste artefacto flotante, de máis de seis metros de altura.

Amador Vilela explicou que cando viu esta baliza pensou que se trataba dunha boia como as empregadas para medir a forza da ondada e a altura das ondas, como a instalada fronte ao litoral de Camariñas, pero esta opción quedou descartada ao non portar ningún elemento sensor ou de medición. Só os restos de que na parte alta houbo no seu momento unha luz, que serviría, supostamente, para alertar aos buques. Trataríase dunha boia de advertencia. Un dispositivo flotante ancorado na auga que alerta aos navegantes sobre os perigos, obstáculos e zonas restrinxidas ou canles seguras. En concreto, esta baliza achada en Muxía serviría para marcar os lados dunha canle de acceso ou saída dun porto.

Todo apunta a que este dispositivo desprendeuse do seu emprazamento orixinal, na entrada dalgunha dársena dos Estados Unidos e os fortes temporais de Terranova, con intensos ventos do oeste, fixeron o resto. De confirmarse a procedencia, este dispositivo viaxou entre 5.500 e 6.000 quilómetros polo Atlántico ata chegar á Costa da Morte.

---

---

---