Trátase da segunda fase do procedemento impulsado por Portos de Galicia
16 sep 2025 . Actualizado á 04:50 h.O Consello da Xunta deu luz verde este luns á reversión ao Estado de terreos portuarios sen uso nos concellos de Laxe, Moaña, Mugardos, O Grove, Poio, Rianxo e Vilagarcía de Arousa.
Estes terreos están incluídos na segunda fase do procedemento impulsado por Portos de Galicia para devolver á Administración central terreos que non necesita e xa non usa con fins portuarios para que, desta forma, poidan ser cedidos aos concellos respectivos que estean interesados en facerse coa súa titularidade.
O trámite foi aprobado polo Consello Reitor do organismo portuario autonómico o pasado mes de xuño. Coa autorización do Consello da Xunta finaliza o procedemento na parte de competencia autonómica.
Estas reversións súmanse ás tramitadas nunha primeira fase —que xa se remitiron a Costas— de terreos na Guarda, A Pobra, Bueu, Cambados, Cangas, Corme, Foz, Ponteceso, Santa Cruz de Oleiros e Vilanova de Arousa.
A Xunta tramitou as reversións en 16 dos 25 procedementos solicitados polos concellos, debido ao uso veciñal deses chans. En próximos meses Portos de Galicia abordará a tramitación dos terreos do resto de municipios pendentes.